هەڵەیەک روویدا! دووبارە هەوڵبدە
رووداو - تەندروستی
دەزگای خۆراک و دەرمان لە ئەمریکا، دەنکۆڵەیەکی نوێ بۆ رێگری لە دووگیانبوون پەسنددەکات و رایدەگەیێنێت، بۆ بەکارهێنانی پێویست بە راوێژی پزیشک ناکات.
دەزگای خۆراک و دەرمان FDA لە ئەمریکا دەرمانێکی نوێ وەکو یەکەم دەرمانی بێ رەچەتە بۆ رێگری لە دووگیانبوون بە ناوی Opill پەسندکرد و بەڕێوەبەری بەشی دەرمان لە دەزگاکە دەڵێت: دەنکۆڵەکە 93٪ کاریگەرە.
دەرمانەکە لەلایەن کۆمپانیای پێریگۆی ئەمریکییەوە بەرهەمدەهێندرێت، دکتۆر پێتریزیا کاڤازۆنی، بەڕێوەبەری بەشی دەرمان لە FDA دەشڵێت: خانمان بەبێ راوێژی پزیشک دەتوانن بەکاری بهێنن، بەمەش پەستانی سەر کلینیکەکان کەمدەبێتەوە.
بە گوێرەی FDA، دەرمانەکە دەبێت رۆژانە بەکاربێت و لە کاتێکی دیاریکراودا بخورێت، تاوەکو کاریگەر بێت بۆ رێگری لە منداڵبوون.
دکتۆر ڤێردا هیکس، پسپۆڕێکی کۆلێژی ئەمریکیی نەخۆشییەکانی خانمان و منداڵبوونە و لەم بارەیەوە دەڵێت، دەنکۆڵەی Opill سەلامەتە و پێویستە رۆژانە بەکاربێت، هەروەها هۆشداریدەدات، ''تووشبووان و چاکبووەوەکانی شێرپەنجەی مەمک نابێت بەکاری بهێنن''.
بە گوێرەی ئامارەکانی FDA، لە ئەمریکا ساڵانە سێ ملیۆن دووگیانبوونی نەخوازراو هەن کە کاریگەریی نەرێنی لەسەر لایەنی دەروونیی تاک و پاشهاتەکانی دووگیانبوون هەیە، هەروەها لە ساڵی 2021 رێژەی سەردانکردنی خانمان بۆ رێگریکردن لە دووگیانبوون 45٪ بووە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ