هەڵەیەک روویدا! دووبارە هەوڵبدە
رووداو - تەندروستی
گوتەبێژی تەندروستیی کەرکووک رایدەگەیێنێت، تائێستا هیچ تووشبوو و گومانلێکراوێکی کۆلێرا تۆمار نەکراوە.
ئەمڕۆ دووشەممە 15-9-2025 سامان یابە، گوتەبێژی تەندروستیی کەرکووک بە رووداوی راگەیاند، تیمەکانیان بەردەوامن لە چاودێریکردنی چێشتخانە و شوێنە گشتییەکان تاوەکو رێگربن لە بڵاوبوونەوەی نەخۆشیی کۆلێرا.
سامان یابە روونی کردەوە، کۆلێرا نەخۆشییەکی کوشندەیە و لە هەر شوێنێک بڵاو ببێتەوە، کەرتی تەندروستیی ئەو شوێنە دەکەوێتە مەترسییەوە. ئەوەشی گوت، ''ئەم ساڵ و ساڵی رابردووش هیچ تووشبوویەکی نەخۆشییەکە تۆمار نەکراوە''.
نیشانەکانی نەخۆشیی کۆلێرا ئەمانەن؛
- سکچوون
- وشکبوونەوەی تووند
- هەستکردن بە تینووێتیی زۆر
- گرژبوونی ماسوولکەکان
- رشانەوە
- لاوازی
رێگەکانی خۆپارێزی لە کۆلێرا چین؟
* پێویستە ئاو بکوڵێندرێت و دوای ساردبوونەوە بخورێتەوە.
* شۆردنی دەستەکان پێش و پاش نانخواردن.
* کوڵاندنی خواردن بەباشی و جوان شۆردنەوەی سەوزە و میوەکان.
* بەکارنەهێنانی ئاوی بیر و ئەو ئاوانەی سەرچاوەیان نادیارە.
* دوورکەوتنەوە لە خواردنی سەردانەپۆشراو و سەر عەرەبانە.
* نەخواردنی سەوزە و میوەکانی چێشتخانەکان.
رێگەکانی چارەسەرکردن؛
- زۆر خواردنەوەی ئاو.
- وەرگرتنی ژیناوی تێکەڵ بە دژەبەکتریا بۆ کەمکردنەوەی سکچوون.
- بەکارهێنانی زینک بۆ منداڵانی خوار تەمەن پێنج ساڵ.
- بەکارهێنانی ژیناوی دەوڵەمەند بە مادە کانزاییەکان.
چەند ڤاکسینێک دژی کۆلێرا هەن کە کاریگەرییەکەیان لە کۆنترۆڵکردنی کۆلێرادا سەلمێنراون، بەڵام بۆ هێشتنەوەی بەرگری لە ئاستێکی بەرزدا پێویستە قورچکی بەهێزکەر وەربگیرێن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ