رووداو - تەندروستی
ناوەندی کۆنتڕۆڵ و پێشگیریکردن لە نەخۆشییەکان CDC لە ئەمریکا رایدەگەیێنێت، لە سەرەتای ئەمساڵەوە تاوەکو ئێستا 884 تووشبووی سوورێژە لە ئەمریکا تۆمارکراون، ئەمەش بەراورد بە ساڵی رابردوو زۆر زیاترە.
ناوەندەکە ئاشکرای دەکات، لە 30 ویلایەتی ئەمریکا بە چڕی نەخۆشییەکە بڵاوبووەتەوە و سێ کەسیش بەهۆیەوە گیانیان لەدەستداوە.
بەپێی ئامارەکان، لە ساڵی رابردوو 285 تووشبووی سوورێژە تۆمارکراون، بەڵام تەنیا لە چوار مانگی ئەمساڵدا بووە بە 884 تووشبووی تۆمارکراو.
ناوەندە ئەمریکییەکەش جەخت لە کوتان بە ڤاکسینی سوورێژە دەکاتەوە و بە تاکە رێگەی پێشگیریکردن لە نەخۆشکەوتن و مردن بەهۆی سوورێژەی دادەنێت.
ئەگەر منداڵ ڤاکسینی سوورێژە وەرنەگرێت، ئاساییە؟
د. گەشبین کاوە، پسپۆڕی نەخۆشییەکانی منداڵان لە چاوپێکەوتنێکدا بە رووداوی راگەیاندووە، سوورێژە نەخۆشییەکی قورسە و نیشانەکان رەنگە 7 بۆ 10 رۆژ بخایەنێت و دەکرێت منداڵەکە تووشی هەوکردنی تووندی سییەکان، گوێ و پەردەی مێشک بن، هەر بۆیە رەنگە بەهۆیانەوە گیانلەدەستبدەن.
روونیشی کردەوە، منداڵ دوو ژەم ڤاکسینی سوورێژە وەردەرگرێت کە ژەمی یەکەم لە تەمەنی 12 بۆ 15 مانگییەوە دەکرێت و ژەمی دووەم لە تەمەنی 4 بۆ 6 ساڵیدا دەکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ