هەڵەیەک روویدا! دووبارە هەوڵبدە
ئەو دوو ئەمبوڵانسەی بۆ تەندروستیی هەڵەبجە دابینکراون. وێنە: تەندروستیی هەڵەبجە
رووداو - تەندروستی
بەڕێوەبەری گشتیی تەندروستیی هەڵەبجە رایدەگەیێنێت: مانگی رابردوو 38 نەخۆش و ئەم مانگە 37 نەخۆش لە هەڵەبجەوە رەوانەی سلێمانی کراون کە ئەوانەن جەڵتەی دڵیان تووشبووە. هۆکاری ناردنەکەش باس دەکات و دەڵێت: پسپۆڕ و بەشی قەستەرەمان نییە، بۆیە تووشبووان و گومانلێکراوانی جەڵتەی دڵ دەنێرینە سلێمانی.
ئەمڕۆ پێنجشەممە 28-8-2025 د. ئازاد مستەفا، بەڕێوەبەری گشتیی تەندروستیی هەڵەبجە لە کۆنگرەیەکی رۆژنامەڤانیدا رایگەیاند، زۆرترین رەوانەکردنی نەخۆشەکان بۆ سلێمانی، بەهۆی نەبوونی بەش و پسپۆڕی قەستەرەوەیە لە پارێزگاکە و هەر کەسێک گومانی جەڵتەی دڵ یاخود تووشبووی جەڵتەی دڵ بێت، بە ئەمبوڵانس دەیاننێرینە سلێمانی.
بەڵام د. ئازاد مستەفا دەڵێت: ئاستەنگی زۆر هەن لە ناردنی نەخۆش، ئەویش بەهۆی نەبوون و کۆنیی ئەمبوڵانسەکانەوە. ئەمڕۆش دوو ئەمبوڵانس بۆ تەندروستیی هەڵەبجە دابینکران کە دانەیەکیان خۆبەخشی بووە.
حاجی عابد هەورامی، خێرخوازێکە و یەکێک لە ئەمبوڵانسەکانی وەکو دیاری داوە بە تەندروستیی هەڵەبجە، ئەوەی دیکەش بەگوتەی د. ئازاد: لە 2023ـەوە داواکراوە بۆ تەندروستیی پارێزگاکە، ئێستا بە بڕی 98 ملیۆن و 150 هەزار دینار دابینکرا.
ئەوەش باس دەکات، سەرۆکی دیوانی ئەنجوومەنی وەزیران، رەزامەندیی داوە لە کڕینی پێنج ئەمبوڵانسی نوێ بۆ هەڵەبجە، بەڵام دەبێت وەزارەتی دارایی رەزامەند بێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ