سەلیم سالم: پەیامم کۆکردنەوەی کورد و عەرەبە

 

 

رووداو: بینەرانی ئازیز، ئەم کاتەتان باش. میوانی ئەمڕۆمان زۆر تایبەتە؛ هونەرمەندێکە کە هەمووتان خۆشتان دەوێت و تێکەڵەیەک لە نێوان هونەری کوردی و عەرەبی دروست دەکات.

 

ستایلێکی تایبەت بە خۆی هەیە و بووەتە نموونەیەکی دیار، هەر گۆرانییەکی نوێ بڵاوبکاتەوە، دەبێتە ترێند و بە شێوەیەکی بەربڵاو بڵاو دەبێتەوە. بەخێر بێیت کاک سەلیم سالم، چۆنیت؟

 

سەلیم سالم: زۆر سوپاس خاتوو کانی. سوپاس بۆ ئەم پێشەکییە نایابە و سوپاس بۆ ستافی کەناڵەکەتان بۆ ئەم میواندارییە جوانە.

 

رووداو: سوپاس بۆ تۆ. سەرەتا، پیرۆزبایی گۆرانییە نوێیەکەت لێ دەکەم.

 

سەلیم سالم: خوای گەورە پاداشتی خێرتان بداتەوە.

 

رووداو: "ئلوس ئلوس"، یان بڵێم "بەو بەو"؟

 

سەلیم سالم: هەمان شتن، "ئلوس ئلوس" و "پارە پارە"، "باو باو، باو باو"ـیش هەمان شتە.

 

رووداو: گۆرانییەکە زۆر خۆشە. چۆن بیرۆکەکەیت بۆ هات؟ چۆن کارت لەسەر کرد؟ هەندێک زانیاریمان پێ بدە.

 

سەلیم سالم: بەگشتی ئەم مۆدێلە، تێکەڵکردنی کوردی و عەرەبییە، بیرۆکەکەی لە گۆرانیی "یا حتەو"ـەوە هات، دەتوانم بڵێم یەکەم گۆرانیی لەو شێوەیە بوو. ئێمە وەکو تیمێکی تەواو کار دەکەین و بیرۆکەکان لەنێوان خۆماندا دەگۆڕینەوە. پێمان باش بوو گۆرانیی کوردی - عەرەبی بڵێین، چونکە ئەم جۆرە تێکەڵکردنە پێشینەی نەبوو. دوای ئەوە، بیرۆکەی "یا حتەو" هات و سوپاس بۆ خودا، کاردانەوەی باشی هەبوو. تەنانەت بووە یەکێک لەو گۆرانییانەی کە شانبەشانی گۆرانیی عێراقی لە دەرەوەی عێراق پێشکێش دەکرا. مەبەستم ئەوەیە، لە جیهانی عەرەبیدا بڵاو بووەوە. ئەوانەشی کە کوردییان نەدەزانی، پرسیاریان دەکرد کە مانای وشەکانی چییە تاوەکو لە زمانەکە تێبگەن.

 

رووداو: ئێستا بەهۆی بوونی پلاتفۆرمەکانی وەکو تیکتۆک و سۆشیال میدیا، بوون بە کەسایەتییەکی جیهانی ئاسانتر بووە. بۆ نموونە، کارەکانی تۆش لەبەر ئەوەی بابەتی زۆر تایبەتیان تێدایە، زۆر بەخێرایی بڵاو دەبنەوە.

 

سەلیم سالم: من گوێگری کورد و عەرەبم هەیە، بۆچی جیهانی نەبم؟ بۆچی ئەمە گونجاو نەبێت؟ من توانای کۆنترۆڵکردنیم هەیە، چونکە پشتیوانیی گوێگری کورد و عەرەبم هەیە.

 

رووداو: تەنانەت خەڵکی بیانیشم بینیوە کە لەسەر گۆرانییەکانی تۆ ڤیدیۆیان دروست کردووە.

 

سەلیم سالم: بەڵێ، لەنێو بیانییەکاندا کەسایەتیی بەناوبانگی وەکو بەرازیلییەک و رووسییەک و زۆری دیکە هەن، کە حەزیان لە میوزیک و وزەی نوێیە.

 

رووداو: تۆ هونەرمەندێکی نمایشییت، ئایا ئەمە یارمەتیت دەدات کە گۆرانییەکانت زیاتر بڵاو ببنەوە؟

 

سەلیم سالم: بە دڵنیاییەوە. کەسایەتیی هونەرمەند بۆ خۆی زۆر بەسوودە و لەنێو هاوپیشەکانیدا جیای دەکاتەوە. واتە، ئەمە زۆر گرنگە و دەبێت شتێکی جیاواز پێشکێش بکەیت؛ شتێک کە تۆ لەوانی دیکە جیا بکاتەوە، نەک بۆ ئەوەی تەنیا دەنگدانەوە دروست بکەیت، بەڵکو بۆ ئەوەی لەنێو ئەوانی دیکەدا جیاواز بیت.

 

رووداو: هەروەها تۆ وشەکانیشت زۆر بەتایبەتی هەڵدەبژێریت.

 

سەلیم سالم: ئەوە کاری شاعیرە، سڵاومان بۆ مامۆستا وەجدی هەیە.

 

رووداو: تۆ چۆن ئەو وشانە هەڵدەبژێریت؟ دەبێت تێکستی گۆرانییەکە چ تایبەتمەندییەکی تێدا بێت تاوەکو تۆ رازی بکات؟

 

سەلیم سالم: زۆربەی ئەو گۆرانییانەی پێشکێشم کردوون، بۆ منداڵانن، بەڵام گەورەکانیش حەزیان لێیە. بێگومان، ئەمە ئەو جۆرە گوێگرەیە کە من دەمەوێت. هەر شتێک پێشکێش بە منداڵان بکەیت، دەبێت وشەکانی لە دڵیانەوە نزیک بێت کاتێک خۆیان دەیڵێنەوە. بۆ نموونە، لای ئێمە منداڵ لە سەرەتای قسەکردنیدا ناڵێت "پارە"، بەڵکو دەڵێت "ئلوس ئلوس". بۆیە ئەم وشەیە هی خۆیەتی و لێی تێدەگات.

 

رووداو: تۆ چۆن بیرت لەوە کردەوە کە بێیت و کار لەسەر منداڵ بکەیت؟

 

رووداو: من کاتێک لە زانکۆ دەمخوێند، لە هۆڵەنداش مامۆستاکەمان هەمیشە دەیگوت، "قووڵترین و باشترین جەماوەر کە پەیدای دەکەیت منداڵە. کە جەماوەری منداڵت پەیدا کرد، ئیتر تەواوە".

 

سەلیم سالم: سوپاس بۆ خودا.

 

رووداو: تۆ چۆن بیرت لەوە کردەوە کار لەسەر منداڵ بکەیت؟

 

سەلیم سالم: هەرگیز ئاسان نییە. سەیر بکە، باسەکە تەنیا بیرکردنەوە نییە. بیر لە شتێک بکەیتەوە و پلانی بۆ دابنێیت، ئەوە تەنیا 20٪ـی کارەکەیە، بەڵام 80٪ـەکەی دیکەی لەلایەن خوای گەورەوەیە. منداڵ کاتێک سەیری تۆ دەکات و کەسایەتیی تۆی خۆش دەوێت، تەنانەت ئەگەر ملیۆنان دیناریش خەرج بکەیت، ناتوانیت ئەو خۆشەویستییە بکڕیت، بەڵام ئەم خۆشەویستییەی منداڵ، خوای گەورە پێت دەبەخشێت. منداڵ چی دەزانێت؟ تەنیا بەو شێوەیە سادەیە سەیری دەکات. تەنانەت لە ئاهەنگەکاندا یەکێک گوێم رادەکێشێت و ئەوی دیکە قژم رادەکێشێت و منیش یارییان لەگەڵ دەکەم.

 

رووداو: راستە، ئەو دەربڕینانەی کە تۆ لەناو گۆرانییەکاندا بەکاریان دەهێنیت، بۆ نموونە "بلبلبللەح" یان "حەپسیو"...

 

سەلیم سالم: ئەمە لە شاعیرەوە یان لەلایەن منەوە نەهاتووە، بەڵکو لە ستۆدیۆ و لە دابەشکاری میوزیکەوە بووە.

 

رووداو: تۆ لەگەڵ شاعیرەکە قسە دەکەیت و دەڵێیت شتێکی وات دەوێت، یان ئەو ستایلی خۆت دەزانێت و تەواو؟

 

سەلیم سالم: نەخێر، وەکو پێمگوتی ئێمە تیمێکین. لەگەڵ دابەشکاری میوزیک و شاعیر، محەممەد کە خەڵکی سلێمانییە و سڵاومان بۆی هەیە، هەروەها شاعیر وەجدی، سڵاومان بۆی هەیە. من و بەڕێوەبەری کارەکانم عەممار مەتەر و تیمی گەنجان لەگەڵمانن. عەمووری، بەڕێوەبەری پلاتفۆڕمەکانم، پێکەوە دادەنیشین، بۆ نموونە من دەڵێم شتێکی لەم شێوەیە هەیە، شاعیر دەڵێت ئەم شتە هەیە، پاشان هەموو بیرۆکەکان کۆ دەکەینەوە و شتێکی سەیر و نوێی لێ دروست دەبێت، ئینجا گۆرانییەکە دروست دەکەین.

 

رووداو: ئایا بیر لەوەش دەکەنەوە کە دواتر چی دەبێت بە ترێند؟

 

سەلیم سالم: بێگومان، باسی دەکەین. ئایا ئەم بیرۆکەیە پێشتر گوتراوە یان نا. لەوانەیە وەکو شیعر کاری لەسەر کرابێت، بەڵام وەکو گۆرانی کاری بۆ نەکراوە.

 

رووداو: باسی منداڵیمان کرد. تۆ خۆت کاتێک منداڵ بوویت، خێزانەکەت رازی نەبوون گۆرانی بڵێیت. بیستوومە جارێک خاڵت قژی تاشیوی لەبەرئەوەی گۆرانیت گوتووە. ئێستا ئەوان، خاڵت و خێزانەکەت، چی دەڵێن؟

 

سەلیم سالم: با راستگۆ بین، ئێمە وەکو هەر خێزانێکی عێراقی یان عەرەبی، کاتێک کوڕەکەمان لە سەرەتای هەرزەکاریدا بێت و بیەوێت بچێتە ئەو بوارەوە، مەحاڵە رازی بین. ئێمە دابونەریتی عەشایەریمان هەیە و شتی وا قبووڵ ناکەین. بەڵام دواتر کاتێک خۆت دەسەلمێنیت، بابەتەکە پێچەوانە دەبێتەوە. سوپاس بۆ خودا ئێستا دایک و باوکم شانازیم پێوە دەکەن.

 

رووداو: خاڵت چی دەڵێت کاتێک دەبینێت کە تۆ ئاوا سەرکەوتوویت؟

 

سەلیم سالم: خاڵم لە هەمووان زیاتر.

 

رووداو: ئێستا لە لاساریی خاڵت قژت درێژ کردووەتەوە؟

 

سەلیم سالم: نازانم ئێستا بێزارە یان نا. نا، ئێستا ئاسایی بووەتەوە، چونکە گەورە بووم.

 

رووداو: بۆچی قژتت خۆشدەوێت؟

 

سەلیم سالم: ئەمە کەسایەتیی منە و پاراستوومە. وەکو گوتم، هەندێکجار کڵاو دەخەمە سەرم و کاتێک منداڵێک سەیری من دەکات، سەری لێ دەشێوێت کە ئایا ئەمە ئەو کەسەیە یان نا. تەنیا بە بەرزکردنەوەی کڵاوەکە دەمناسێتەوە، بۆیە ئەمە بووەتە کەسایەتیی من و ئەو وێنەیەی پێی دەناسرێمەوە.

 

رووداو: ناوی راستەقینەت چییە، سەلیم؟

 

سەلیم سالم: ناوی راستەقینەم حوسێن سەلیمە.

 

رووداو: حوسێن سەلیم، دیارە باوکت زۆر خۆشدەوێت کە ناوی هونەریی خۆتت بە ناوی ئەوەوە ناوە، هۆکارەکەی چییە؟

 

سەلیم سالم: لای من یەکەم شت لە ژیانمدا خێزانەکەمە، کە لە باوکمەوە دەستپێدەکات تاوەکو دوایین ئەندامی خێزانەکەم.

 

رووداو: بۆچی بۆ نموونە ناوی براکەت، مامت یان خاڵتت هەڵنەبژارد؟ بۆچی باوکت؟ دەمەوێت نهێنیی نێوان تۆ و باوکت بزانم.

 

سەلیم سالم: چونکە باوکمە. من زۆر حەزم لە ناوی حوسێنە، بەڵام نەمبیستووە گۆرانیبێژێک لە عێراق یان لەنێو عەرەبدا ناوی سەلیم بێت. هەست دەکەیت ناوێکی جیاوازە، سەلیم سالم جیاوازە. هەروەها لەگەڵ کەسایەتییەکی چالاکدا دەگونجێت. لەگەڵ ئەوەشدا، بەڕاستی خۆشەویستییەکی زۆرم بۆ باوکم هەیە.

 

رووداو: باشە، باوکت چیی گوت کاتێک زانیی ناوی ئەوت وەکو ناوی هونەری بەکارهێناوە؟

 

سەلیم سالم: دەڵێت تووشی کێشە بووە، ئەو کەسانەی لە ناوچەکەمانن و من ناناسن، پێی دەڵێن "کاکە، چۆن ناوی تۆ سەلیمە و ناوی کوڕەکەشت سەلیمە؟" پاشان دەستدەکەن بە گفتوگۆکردن لەگەڵی. پێیگوتم "تۆ کێشەیەکت بۆ من دروستکرد، ئێستا هەمووان بانگم دەکەن سەلیم".

 

رووداو: باشە، با بچینە سەر پرسیارێکی دیکە. ئەمجارە با پرسیارەکە بە کوردی بێت. ئاستی کوردییەکەت چۆنە؟

 

سەلیم سالم: زۆر باش نیم، زمانی کوردیم باش نییە.

 

رووداو: مەبەستم ئەوەیە، لەگەڵ زمانی کوردی چۆنیت؟

 

سەلیم سالم: گۆرانی گوتن؟

 

رووداو: گۆرانی و قسەکردن.

 

سەلیم سالم: لە گۆرانی گوتندا، رەنگە 90%ـی باش بێت. نازانم ئایا وشەدانانم لە کوردیدا باشە؟

 

رووداو: زۆر باشە.

 

سەلیم سالم: زۆر باشم؟

 

رووداو: بۆیە پرسیارم بە کوردی لێ کردیت، گوتم ئێستا کوردییەکەی زۆر باشە.

 

سەلیم سالم: ئەمە لە چاکەی دابەشکاری میوزیکی و شاعیرەکەیە، ئەوان فێرم دەکەن. نا، بەڕاستی، لە شتە سادەکاندا دەتوانم خۆم دەرباز بکەم، تێدەگەم، بەڵام ناتوانم وەڵام بدەمەوە.

 

رووداو: ئێستا خۆت لەکوێ دەژیت؟

 

سەلیم سالم: من لە کوردستانم، لە هەولێر.

 

رووداو: دەتەوێت فێری کوردی بیت؟

 

سەلیم سالم: ئەو هەوڵەی داومە، بۆ ئەوە بووە کە بە کوردی گۆرانی بڵێم و دیار نەبێت عەرەبم. ئەمە یەکەم هەوڵە. هەوڵی دووەمیشم ئەوەیە کە فێری ببم و بە زمانی کوردی بە باشی قسە بکەم.

 

رووداو: لە کاتی گۆرانییەکاندا زۆر هەڵە دەکەیت؟

 

سەلیم سالم: بەدڵنیاییەوە. سەیری بکە، بۆ ئێوە کوردی ئاسانە، چونکە زمانی خۆتانە، بەڵام ئێمە پێمان وایە کوردی لە ئینگلیزی سەختترە، چونکە پیتی زۆری تێدایە. بۆ نموونە، لای ئێوە جیاوازییەک لە نێوان "ب" و "پ"ـدا هەیە. هەروەها ئێمە لە عەرەبیدا "ژ" و "ڤ"ـمان نییە. پیتی "ژ" وەکو ئەوە وایە لە نێوان "ج" و "ز" بێت، نازانم چۆن دەگوترێت.

 

رووداو: قورسترین شت چی بووە کاتێک بە کوردی گۆرانیت گوتووە؟

 

سەلیم سالم: گوتم، شێوەزار.

 

رووداو: تەنیا لە ئەکسێنتەکەدا؟ بەڵام ئەکسێنتەکەت زۆر باشە، ماشەڵڵا.

 

سەلیم سالم: بەڵێ، ئێمە بەردەوام دووبارەی دەکەینەوە. ئەو گەنجانەی لەگەڵ منن و کوردی دەزانن، هەروەها دابەشکاری میوزیکی و شاعیرەکە کە زۆر شارەزان، تێبینیم پێدەدەن و لێیان دەپرسم ئایا بە دروستی دەیڵێم یان نا. ئەوانیش دەڵێن لە شێوەی قسەکردنەکەتەوە دیارە کە عەرەبیت.

 

رووداو: ئێمە لێی ورد دەبینەوە تاوەکو باش دەربچێت. دەزانم کورد حەزی لەو تێکەڵکردنە و ئەو جۆرە گۆرانییانەیە؛ ئایا جەماوەری عەرەبیش بە هەمان شێوەن؟ دەمانەوێت بۆچوونی راستگۆیانەی تۆ بزانین. دەزانم کورد زۆر حەزی لەو تێکەڵکردنەیە، ئایا هەوادارە عەرەبەکانیشت هەمان حەزیان هەیە؟

 

سەلیم سالم: هەر ئەوەندەی هەواداری کورد و عەرەب گوێم لێ بگرن، بەسە. ئەکسێنتەکە باشە یان نا، گرنگ ئەوەیە گۆرانییەکە بچێتە نێو دڵیانەوە؛ ئەوە گرنگترین شتە.

 

رووداو: کاردانەوەی جەماوەری عەرەبی چۆنە، هەروەکو کوردە؟

 

سەلیم سالم: مەبەستت کاردانەوەی عەرەبی عێراقییە؟

 

رووداو: بەڵێ.

 

سەلیم سالم: بەپێچەوانەوە، حەزیان بۆ فێربوونی کوردی پەیدا کردووە. لە کۆمێنتەکاندا سەیریان بکە چی دەڵێن، بۆ نموونە: ''ئەمە واتای چییە؟''، ''ئەوە مانای چییە؟''، ''مەبەستت بەم وشەیە چییە؟''، ''ماناکەی بە عەرەبی چییە؟''. حەزیان لەوەیە فێری کوردی بن. من پێم وایە ئەمە پەیامێکە بۆ کۆکردنەوەی کورد و عەرەب.

 

رووداو: وابزانم پەیامەکەت گەیشتووە.

 

سەلیم سالم: گەیشتووە.

 

رووداو: چونکە هێشتا منداڵ دەبینم کە بە کوردی دەیڵێنەوە، منداڵی کوردیش بە عەرەبی گۆرانی دەڵێن کە هیچ عەرەبی نازانن.

 

سەلیم سالم: سوپاس بۆ خودا.

 

رووداو: کەواتە پەیامەکەت گەیشتووە.

 

سەلیم سالم: بەڕاستی پەیامەکەم ئەوەیە.

 

رووداو: دەتەوێت چیی زیاتر بکەیت، بە تایبەتی لە نێوان تێکەڵکردنی گۆرانیی عەرەبی و کوردیدا؟ دەتەوێت دوێتی دیکە لەگەڵ هونەرمەندان بکەیت؟

 

سەلیم سالم: بەڕاستی زۆر کاری دوێتم لەگەڵ هونەرمەندانی کورد پێشکێشکراوە. سڵاوم بۆ هەموویان هەیە و شانازی دەکەم کاریان لەگەڵ بکەم، بەڵام من یەک دوێتم لەگەڵ هونەرمەند و هاوڕێم، تەها قادر کردووە. سڵاوم بۆی هەیە. ئەزموونێکی نایاب بوو. لە داهاتوودا هیواخوازم کارێکی جوان بکەین. گرنگ نییە ئایا دوێت دەکەم یان نا، گرنگترین شت ئەوەیە کارەکە بۆ گەلی عێراق جوان بێت.

 

رووداو: دەتەوێت لەسەر ئەو تێکەڵکردنە بەردەوام بیت؟

 

سەلیم سالم: من ئێستا گوێگرێکی کوردم هەیە. کاتێک گۆرانییەک تەنیا بە عەرەبی بڵاو دەکەمەوە، پرسیارم لێ دەکەن، "بۆچی بە کوردی گۆرانی ناڵێیت؟"

 

رووداو: کەواتە وا دەڵێن، ''لێت دڵگران دەبین ئەگەر کوردیی تێدا نەبێت''.

 

سەلیم سالم: بۆیە لە هەموو گۆرانییەکدا دەستم کردووە بە زیادکردنی کوردی. هەردوو گوێگر مافیان بەسەرتەوە هەیە. بەڵێ، سەختە.

 

رووداو: بێگومان وایە. میوزیکی کوردی و عەرەبی چۆن تێکەڵ دەکەیت، چونکە ریتمەکانیان جیاوازن؟ ریتمی عێراقی زۆر جیاوازە و ریتمی کوردیش زۆر جیاوازە. چۆن دەتوانیت بەو شێوەیە تێکەڵیان بکەیت، ئایا بۆت قورس نییە؟

 

سەلیم سالم: لە رووی ئاوازەوە بەڕاستی بۆ من سەختە، بەڵام هەندێک جار ئیلهام لەوانەوە دێت کە لەگەڵتدان؛ وزەی گەنجان و هاوڕێکانت. من دەرچووی کۆلێژی هونەرە جوانەکانم و چوار ئامێری میوزیک دەژەنم، بۆیە دەزانم چ ئاوازێک دادەنێم و چۆن لەنێوان ریتمە کوردی و عەرەبییەکاندا تێکەڵیان دەکەم. پسپۆڕییەکەم لە ریتمدایە، بۆیە بە شێوەیەک لەنێوان ئەم و ئەودا تێکەڵیان دەکەم کە هەستی پێ ناکرێت؛ جارێک هەست دەکەیت عەرەبییە، واتە ریتمی عێراقییە و جارێکی دیکە کوردییە. رەنگە هەست بکەیت ئەو ریتمانەی لە رۆژهەڵاتی عێراقن، تێکەڵەیەک لەخۆ دەگرن. ئەگەر سەرنجی ئاوازەکە بدەیت، ئەو شێوازەی لە ئاوازەکەدایە لە گۆرانییە سوورییەکانەوە نزیکە، واتە من تێکەڵم کردووە. هەندێک جار وشەی موسڵاوی، هەندێک جار کەنداوی و هەندێک جاریش کوردی تێکەڵ دەکەم، بەپێی چوارچێوە و گونجان، شتێکی جوانیش دەردەچێت.

 

رووداو: سەلیم، گوێ لە گۆرانیی کوردی دەگریت؟

 

سەلیم سالم: بەڵێ، گوێ دەگرم. دوای ئەزموونەکەم، دەستم کردووە بە گوێگرتن لە گۆرانیی کوردی. دەبێت فێر بم، چونکە دوای ئەوەی لە کوردستان نیشتەجێ بووم، پێویستە هونەرەکەت فرەڕەنگ بێت و لە شتەکان شارەزا بیت. پێشتر بەڕاستی گوێم لێ نەدەگرت، بەڵام کاتێک گوێم لە گۆرانییەکان گرت، سەرسام بووم بە هونەری کوردی. بەڕاستی سەرسام بووم، شتی زۆر جوان هەن و لە ستایلی عەرەبی و ئەورووپییەوە دوورن، شتێکی نوێیە بۆ من. 

 

رووداو: گوێ لە کێ دەگریت؟ با بڵێین، گوێ لە چ ستایلێک دەگریت؟

 

سەلیم سالم: بەپێی ستایلی خۆم، زیاتر حەزم لەوانەیە کە ریتمێکی خێرایان هەیە، بەڵام ژمارەیەک گۆرانی هەن کە ناوەکانیان نازانم و حەز دەکەم گوێیان لێ بگرم. بۆ نموونە گۆرانییەکانی ئەو هونەرمەندەی کە پێم وایە هاوژینی هونەرمەند پەرواز حوسێنە؛ گۆران، سڵاوم بۆی هەیە و زۆر حەزم لە گۆرانییەکانییەتی.

 

رووداو: ئەی لەبارەی فۆلکلۆرەوە، گوێ لە گۆرانیی کوردیی فۆلکلۆریش دەگریت؟

 

سەلیم سالم: فۆلکلۆری کوردی، بەڵێ بێگومان، بەڵام نازانم هیی کێیە. وەکو دەزانیت، کاتێک لە یوتیوب بەدوایدا دەگەڕێیت، تەنیا وێنەی هونەرمەندێکی کۆن دەردەکەوێت، بۆیە ناوی نازانم، چونکە ناوەکە بە کوردی نووسراوە و ناتوانم بیخوێنمەوە، بەڵام گوێی لێ دەگرم و جوانە.

 

رووداو: باشە، با بێینە سەر بەرهەمە نوێیەکەت "ئلوس ئلوس". دەکرێت باسی ستافی کارەکەمان بۆ بکەیت؟

 

سەلیم سالم: تێکستی گۆرانییەکە لەلایەن شاعیر وەجدییەوە نووسراوە، دابەشکردنی میوزیک و میکس لەلایەن مایسترۆ دانیار محەممەدەوە کراوە و کاری دەرهێنانیشی دەرهێنەر بەڕا تەیار بۆی کردووە، ئەمە یەکەمجارە لەگەڵیدا کار دەکەم. سڵاوم بۆی هەیە و سەرەتایەکی زۆر جوان بوو. ئاوازەکەشی هیی خۆمە. بەڕاستی ئەم کارە زۆرترین تێچووی ماددیی هەبووە.

 

رووداو: چەندی تێچووە؟

 

سەلیم سالم: نزیکەی 65 هەزار دۆلاری تێچووە.

 

رووداو: تەنیا کلیپەکە یان هەموو بەرهەمەکە؟

 

سەلیم سالم: نامەوێت باسی وردەکارییەکە بکەم، بەڵام بۆ نموونە، تەنیا کرێی دەرهێنەر نزیکەی 20 هەزار دۆلار بوو، لەگەڵ تێچووەکانی دیکەدا بەم شێوەیە کۆ بووەوە. بەڵام کاتێک کلیپەکەم بینی، گوتم شایەنیەتی. شایەنی ئەو 65 هەزار دۆلارەیە. منداڵان و خەڵکیش شایەنی ئەوەن.

 

رووداو: تۆ ئاهەنگی خێزانی و شەوانەش ساز دەکەیت؟

 

سەلیم سالم: تەنیا ئاهەنگی خێزانی.

 

رووداو: هەرکەسێک باسی ئاهەنگەکانت دەکات، دەڵێت کەشێکی زۆر خۆشیان هەیە.

 

سەلیم سالم: دەبێت ئاهەنگێکی من ببینن.

 

رووداو: بێگومان دەبێت بێم. پەیوەندیت لەگەڵ ئەو جەماوەرەی دێنە ئاهەنگەکانت چۆنە؟

 

سەلیم سالم: هەندێک جار لەنێو جەماوەردا کەسانێک هەن کە پێش ئاهەنگەکە دێنە لام و دەڵێن حەزیان لە ئاهەنگ نییە و بەشداری ناکەن، بەڵام منداڵەکانیان ناچاریان کردوون بێن. کەچی دواتر کەشەکەیان زۆر بەدڵ دەبێت. ئەمە شتێکی جوانە. منداڵەکانیش سەر دەکەونە سەر سەکۆ و سەکۆکە پڕ دەبێت لە منداڵ، بە جۆرێک هەمووان سەرسام دەبن بە منداڵەکان و چۆن بە خۆشییەوە سەما دەکەن.

 

رووداو: قەت تووڕە نابیت کە ئەو هەموو منداڵە دێنە سەر ستەیج و رەنگە گۆرانییەکەت لێ تێک بدەن؟

 

سەلیم سالم: نەخێر، بەڵکو زیاتر گەرموگوڕیم بۆ دروست دەبێت و لەگەڵیان تێکەڵ دەبم. یەکێکیان گوێم رادەکێشێت و ئەوی دیکەیان قژم، یەکێکیان لێم دەدات و یەکێکی دیکە لێم دەپرسێت بۆچی وێنەی لەگەڵ ناگرم. زۆر حەزم لەم دۆخەیە.

 

رووداو: ژیانی هاوژینیت پێکهێناوە؟ منداڵت هەیە؟

 

سەلیم سالم: نەخێر، ژیانی هاوژینیم پێک نەهێناوە.

 

رووداو: بەڵام منداڵت خۆش دەوێت. کاتێک لە داهاتوودا ژیانی هاوژینیت پێکهێنا...

 

سەلیم سالم: بێگومان، هیواخوازم.

 

رووداو: دەتەوێت چەند منداڵت هەبێت؟

 

سەلیم سالم: کوڕێک و کچێک بەسە. خۆشەویستیی خۆمیانی دەدەمێ.

 

رووداو: خەونت بۆ داهاتوو چییە؟ پێنج ساڵی دیکە سەلیم سالم لە کوێ دەبینیت؟

 

سەلیم سالم: دوای پێنج ساڵی دیکە لەو ئاواتە دەبم کە لە مێشکمدا دروستم کردووە. پەیامەکەم ئەوەیە بە کوێ دەگەم و چی پێشکێش دەکەم، بە مەرجێک بە هەردوو زمانی کوردی و عەرەبی بگەمە ئەو ئاواتەی پلانم بۆ داناوە و ئەو خاڵەی دیارییم کردووە. دەگەمە ئەو خاڵەی کە لە مێشکمدایە. ئاشکرای ناکەم، تەنیا کاتێک دێتە دی، ئەو کاتە دەڵێم ئەمە ئاواتم بوو و پێی گەیشتم.

 

رووداو: تۆ چ کەلوویەکیت؟

 

سەلیم سالم: فەریک.

 

رووداو: دەڵێن ئەوانەی کەلوویان فەریکە، زۆر جددین لە کارەکانیاندا.

 

سەلیم سالم: زۆر زۆر جددیم، هەندێک جار تووڕە دەبم بە جۆرێک کەسایەتیم دەگۆڕێت بۆ کەسێکی دیکە، وادەڵێیت ئەمە خۆی نییە، بەڵام کاتێک کەسێک گرنگی بە کارەکەی بدات، دەگاتە ئەوەی دەیەوێت.

 

رووداو: با پرسیارێکت لەسەر گۆرانییەکانی خۆت لێ بکەم، کام گۆرانیی خۆتت لە هەموویان پێخۆشترە؟

 

سەلیم سالم: گۆرانییەکانم کامیان لە دڵمەوە نزیکە؟ بەخوا هەموویانم خۆشدەوێت.

 

رووداو: بەڵام دەبێت یەکێکیان زیاتر لە دڵتەوە نزیک بێت.

 

سەلیم سالم: هەموویانم خۆشدەوێت، وەکو منداڵەکانم وان. هەندێکیان حەزیان لە "یا حتة"یە و حەزیان لە "گوڵ گوڵی" نییە. ئەگەر بڵێم حەزم لە "یا حتة"ـیە، دەڵێن بۆچی؟ چونکە ئەوان هەست دەکەن هی ئەوانە، بەڵام بەڕاشکاوی، گۆرانییەکانی منداڵان یان تاوەکو "گوڵ گوڵی" و "لووس لووس"، ئەمانە ئەو گۆرانییانەن کە تێکەڵەیەکی نێوان کوردی و عەرەبییان تێدایە و زۆر جوانن.

 

رووداو: ئێستا ئەگەر پێت بڵێین بەشێک لە یەکێک لە گۆرانییە کوردییەکانت بڵێیت، دەتوانیت؟ هەر کامێکیان بێت.

 

سەلیم سالم: گۆرانیی "پارە پارە" دەڵێتەوە.

 

رووداو: گۆرانییەکی دیکەمان بۆ بڵێ.

 

سەلیم سالم: بۆ نموونە چی؟

 

رووداو: خۆت حەزت لە چییە؟ هی خۆت بێت یان هی هونەرمەندێکی دیکە؟ خەڵک دەیەوێت گوێت لێ بێت بە شێوەی لایڤ.

 

سەلیم سالم: ئێستا چ شێوازێکتان دەوێت؟

 

رووداو: ئەوەی خۆت حەزت لێیەتی.

 

سەلیم سالم: بەخوا هیچ نایەت بە خەیاڵمدا.

 

رووداو: با من یەکێکت بیربخەمەوە، 'یا حتة من قلبي'.

 

سەلیم سالم: ئەوە هی خۆمە.

 

رووداو: باشە، حەزت لە کام هونەرمەندە؟ کازم ساهیر، ماجد موهەندیس، یان رەحمە ریاز؟

 

سەلیم سالم: کازم ساهیر، ماجد موهەندیس، حاتم عێراقی و لە خانمانیش رەحمە ریاز کە چاکەی زۆری لەگەڵمدا هەبووە.

 

رووداو: دەتوانیت گۆرانییەکی رەحمە ریاز، حاتم عێراقی یان مەوالێکی عێراقیمان بۆ بڵێیت؟

 

سەلیم سالم: بەڵێ، بەڵام قورگم کەمێک ماندووە.

 

رووداو: زۆر سوپاس.