گوتەبێژی ئەپیکور کۆمپانیایەکی راوێژکاریی وزە لە قامشلۆ دەکاتەوە

 

کۆمپانیاکە پلانی هەیە لە دوو بواری سەرەکیدا کار بکات: یەکەمیان، پڕۆژەی بیناسازی و خزمەتگوزاری بۆ سوپای ئەمریکا و دووەمیش، راوێژدان بە گەورە کۆمپانیا نێودەوڵەتییەکانی بواری نەوت بۆئەوەی بچن وەبەرهێنان لە کەرتی وزەی بەڕێوەبەرایەتیی خۆسەردا بکەن. 

 

مایڵز کاگنز، خاوەنی کۆمپانیای (وۆردز وۆریەرز) "Words Warriors"، رۆژی شەممە لە نیویۆرکەوە لە رێگەی ڤیدیۆوە میوانی بوولتەنی کاژێر 19:00ی تۆڕی میدیایی رووداو بوو کە دلبخوین دارا پێشكێشی کرد. 

 

کاگنز رایگەیاند، کردنەوەی نووسینگەکەیان لە قامشلۆ "سەرەتایەکە" بۆ کردنەوەی دەرگای وەبەرهێنانی نێودەوڵەتی لە ناوچەکە، بەتایبەتی لە کەرتی نەوتدا.

 

 

سەبارەت بە دۆخی ئێستای کەرتی نەوتی رۆژئاوای کوردستان، کاگنز ئاماژەی بەوە کرد، "ئێستا هیچ نەوتێکی سووریا هەناردەی بازاڕە جیهانییەکان ناکرێت و ئەو بڕەی بەرهەم دەهێندرێت، تەنیا بۆ بەکاربردنی ناوخۆییە."

 

بە بڕوای کاگنز، ناوچەکە توانایەکی زۆری هەیە و گوتی: "پێمان وایە لە باکووری رۆژهەڵاتی سووریا دەتوانرێت رۆژانە زیاتر لە 50 هەزار بەرمیل نەوت بەرهەم بهێندرێت، رەنگە بگاتە 100 هەزار بەرمیلیش و لە رێگەی بەندەری تەرتووسەوە هەناردەی بازاڕە جیهانییەکان بکرێت."

 

کێڵگە نەوتییەکانی ناوچەکە بەهۆی شەڕی داعش و هێرشە ئاسمانییەکانی تورکیاوە زیانیان بەرکەوتووە و کەرەستەکانیان کۆن بوون. کاگنز پێی وایە کۆمپانیا ئەمریکییەکان دەتوانن رۆڵێکی گرنگ لە نۆژەنکردنەوەیان ببینن.

 

ئەو گوتی: "ئەوان دەتوانن بێن و هەڵسەنگاندنێکی گشتگیر بکەن، پشکنین بۆ بیرە نەوتەکان بکەن و دواتر بە تەکنەلۆجیای نوێ پەرەیان پێ بدەن و بەرهەمهێنان زیاد بکەن."

 

 

کۆمپانیای (وۆردز وۆریەرز) راستەوخۆ وەبەرهێنان لە بەرهەمهێنانی نەوتدا ناکات، بەڵکو وەک کاگنز روونیکردەوە، رۆڵی راوێژکاری دەبینێت. "کۆمپانیاکەی من لەسەر بنەمای پەیوەندییەکان دامەزراوە. ئێمە راوێژ بە کۆمپانیا گەورەکانی نەوت دەدەین لەبارەی چۆنیەتیی کارکردنیان لەگەڵ سەرکردایەتیی بەڕێوەبەرایەتیی خۆسەری دیموکراتیی باکوور و رۆژهەڵاتی سووریا."

 

یەکێک لە ئاستەنگە سەرەکییەکان، سزاکانی سەر سووریایە. کاگنز ئاشکرای کرد، کە هەنگاوی دیپلۆماسیی گرنگ لە ئارادان بۆ چارەسەرکردنی ئەم کێشەیە و گوتی: "دوو رۆژی دیکە، [ئەحمەد شەرع] سەرۆکی سووریا، سەردانی کۆشکی سپی دەکات و لەگەڵ سەرۆک [دۆناڵد] ترەمپ کۆدەبێتەوە. هەروەها هەوڵ هەیە بۆ ئەوەی بانکی ناوەندیی سووریا ببێتەوە بەشێک لە سیستمی سویفتی جیهانی."

 

 

کاگنز جەختی لەوە کردەوە کە کلیلی سەرکەوتنی ئەم پڕۆژەیە، هەبوونی رێککەوتنێکی سیاسییە لەنێوان حکومەتی دیمەشق و بەڕێوەبەرایەتیی خۆسەردا. ئەو دەڵێت: "دیمەشق پێویستی بە پارەیە، باشترین رێگەش بۆ دەستکەوتنی پارە، بەرهەمهێنان و هەناردەکردنی نەوتە. بۆیە گرنگە دیمەشق بە واشنتن نیشان بدات کە پێشوازی لە وەبەرهێنەری ئەمریکی دەکات."

 

کاگنز کە پێشتر گوتەبێژی هاوپەیمانیی نێودەوڵەتیی دژی داعش بووە، پێی وایە ئابوورییەکی بەهێز دەبێتە هۆی کەمبوونەوەی تیرۆر و زیادبوونی سەقامگیری لە سووریا.

 

 

کاگنز کە لە ماوەی ساڵی رابردوودا شەش جار سەردانی سووریای کردووە، دڵنیایی دەدات کە "باکووری رۆژهەڵاتی سووریا بۆ کاری بازرگانی ئارامە" و بە "پەرەسەندنێکی سرووشتی" دەزانێت کە ئەو کۆمپانیایانەی لە هەرێمی کوردستان کار دەکەن، روو لە رۆژئاوای کوردستانیش بکەن.

گوتەبێژی پێشووی هاوپەیمانان داوای کرد هێزەکانی ئەمریکا لە ناوچەکە بمێننەوە و گوتی: "یەکێک لەو پەیامانەی ئاراستەی بەرپرسانی واشنتنم کردووە ئەوەیە، کە پێویستە ئەمریکا بەردەوام بێت لە هەبوونی سەربازی لە باکووری رۆژهەڵاتی سووریا."

 

ئەو ئاشکراشی کرد کە کۆمپانیاکەی لەگەڵ کۆمپانیایەکی بیناسازیی کوردیدا کار دەکات بۆ دروستکردنی سەنتەری ئۆپەراسیۆن و نەخۆشخانە لە بنکەیەکی سەربازیی نزیک حەسەکە و تل تەمر کە هێزەکانی ئەمریکای تێدان.

 

 

 

مایڵز کاگنز: کۆمپانیاکەی من نووسینگەیەک لە قامشلۆ دەکاتەوەو دوو پڕۆژەمان دەبێت. یەکێکیان پڕۆژەی هاوبەش دەبێت لەگەڵ سوپای ئەمریکا بۆ کاری بیناسازی و خزمەتگوزارییەکانی دیکە، کە سوپای ئەمریکا پێویستی پێیانە. پڕۆژە گەورەکەی دیکەشمان یارمەتیدانی کۆمپانیاکانی وزە و کۆمپانیا نەوتییە بیانییەکان دەبێت بۆ ئەوەی بێنە ناوچەکانی باکوور و رۆژهەڵاتی سووریا. ئێستا هیچ نەوتێکی سووریا هەناردەی بازاڕە جیهانییەکان ناکرێت. ئەو نەوتەی لە باکووری رۆژهەڵات بەرهەم دەهێندرێت، بۆ بەکاربردنی ناوخۆییە و چەند پاڵاوگەیەکی بچووک هەن، کە تەنیا بەشی دابینکردنی بەنزین و گازوایل بۆ خەڵکی باکوور و رۆژهەڵاتی سووریا دەکەن. ئێمە پێمان وایە لە باکووری رۆژهەڵاتی سووریا دەتوانرێت رۆژانە زیاتر لە 50 هەزار بەرمیل نەوت بەرهەم بهێندرێت، رەنگە بگاتە 100 هەزار بەرمیلیش و لە رێگەی بەندەری تەرتووسەوە بە دەریای نێوەڕاستدا هەناردەی بازاڕە جیهانییەکان بکرێت.

 

 

 

مایڵز کاگنز: ئێستا کۆمپانیای نەوتی جەزیرە هەیە، کە نەوت بەرهەم دەهێنێت. بەڵام وەک دەزانیت، دڵبخوین و بینەرانی رووداو ئاگادارن کە باکووری رۆژهەڵاتی سووریا رووبەڕووی چەندین ئاستەنگ بووەتەوە، لەوانە گەمارۆکان، هەروەها تورکیا هێرشی ئاسمانیی کردووەتە سەر ژێرخانی نەوت. داعشیش بۆ ماوەیەک دەستی بەسەر بەشێک لە ژێرخانی نەوتیدا گرتبوو. بۆیە زۆرجار کەرەستەکان زیانیان پێگەیشتووە یان کۆنن. ئێمە پێمان وایە کۆمپانیا ئەمریکییەکان دەتوانن بێنە باکووری رۆژهەڵاتی سووریا و دەست بە هەڵسەنگاندنێکی گشتگیر بکەن. دەتوانن پشکنین بۆ بیرە نەوتەکان بکەن و دواتر بەرەوپێشیان ببەن و بەرهەمهێنانی نەوت زیاد بکەن.

 

 

 

مایڵز کاگنز: کۆمپانیاکەی من لەسەر بنەمای پەیوەندییەکان دامەزراوە. بۆیە ئێمە راوێژ بە کۆمپانیا گەورەکانی نەوت دەدەین لەبارەی چۆنیەتیی کارکردنیان لەگەڵ سەرکردایەتیی بەڕێوەبەرایەتیی خۆسەری دیموکراتیی باکوور و رۆژهەڵاتی سووریا. ئێمە لەبارەی خەڵک، کولتوور و ئاسایشی باکوور و رۆژهەڵاتی سووریا رێنماییان دەکەین. هەنگاوی گرنگی داهاتووش ئەوەیە کە رێککەوتن لەنێوان دیمەشق، واتە حکومەتی راگوزەری سووریا و سەرکردایەتیی باکوور و رۆژهەڵاتی سووریا بکرێت. پێویستە رێککەوتنەکان یاساکانی بەرهەمهێنان و هەناردەکردنی نەوت دیاری بکەن.

 

 

 

مایڵز کاگنز: دوو رۆژی دیکە، سەرۆکی سووریا، شەرع، سەردانی کۆشکی سپی دەکات و لەگەڵ سەرۆک ترەمپ کۆدەبێتەوە. هەروەها دەزانین کە وەزیرەکانیشی لەگەڵ وەزیر و بریکاری وەزیرەکانی حکومەتی ئەمریکا لە کۆبوونەوەدان. ئەوان لە چەندین ئاراستەی جیاوازەوە کار دەکەن. چالاکیی هاوکات هەن بۆ ئەوەی بانکی نێوەندیی سووریا ببێتە بەشێک لە سیستمی نێودەوڵەتی، کە ئێمە پێی دەڵێین سیستمی سویفت. هەوڵەکان لە گفتوگۆکانی نێوان وەزیری وزە و بەرپرسانی سیاسەتی وزەی ئەمریکادا هەن بۆ ئەوەی باس لەوە بکرێت، کە چۆن سووریا سیاسەتێکی وزەی دەبێت و دێتە نێو بازاڕی جیهانییەوە بۆ هەناردەکردن. ئەم هەنگاوانە گرنگن بۆ رەخساندنی دەرفەت بۆ کۆمپانیاکان تاوەکو بێنە سووریا و وەبەرهێنان بکەن. ئەو وەبەرهێنانانەش دەبێت بۆ کۆمپانیاکان سەلامەت و قازانجبەخش بن.

 

 

مایڵز کاگنز: دلبخوین، هاوڕێکەم، من لە ماوەی ساڵی رابردوودا شەش جار سەردانی سووریام کردووە. تەنانەت لە ئەیلوولی 2024 لە سووریا بووم، کاتێک رژێمی ئەسەد هێشتا لە دەسەڵاتدا بوو. باکووری رۆژهەڵاتی سووریا بۆ کاری بازرگانی ئارامە. هەندێک لەو کۆمپانیا نەوتیانەی کە دەیانەوێت بچنە باکووری رۆژهەڵاتی سووریا، ئێستا لە هەرێمی کوردستانی عێراق کار دەکەن. ئەمەش تەنیا پەرەسەندنێکی سرووشتییە. پێشکەوتنێکی سرووشتییە کە بیانەوێت بە هەمان شێوەی لە هەرێمی کوردستانی عێراق نەوت بەرهەم دەهێنن، لە باکووری رۆژهەڵاتی سووریاش بەرهەمی بهێنن.

 

 

مایڵز کاگنز: ئێمە پێمان وایە گرنگە دیمەشق و بەڕێوەبەرایەتیی خۆسەری باکوور و رۆژهەڵاتی سووریا رێککەوتنێک بکەن. دیمەشقیش پێویستی بە پارەیە، باشترین رێگەش بۆ سووریا بۆ دەستکەوتنی پارە، بەرهەمهێنان و هەناردەکردنی نەوتە. بۆیە گرنگە دیمەشق بە ئیدارەی ترەمپ و واشنتنی نیشان بدات کە پێشوازی لە وەبەرهێنەرە ئەمریکییەکان لە کەرتی نەوت و گازدا دەکات. کاتێک ئابوورییەکی بەهێزیان لە سووریا هەبێت، ئەمە یارمەتیی ناوبانگی جیهانیی سووریا دەدات و هەروەها ئەو شوێنانەی ئابووریی بەهێزیان هەیە، بە شێوەیەکی گشتی تیرۆریان زۆر کەمترە. بۆیە ئابووریی بەهێز بۆ ئاسایش و سەقامگیری گرنگە.

 

 

مایڵز کاگنز: بەڵێ، من سەردانی کێڵگە نەوتییەکانی نزیک رومێلانم کردووە، کە پێی دەڵێن ناوچەی سوێدییە، هەروەها شوێنەکانی دیکەی باکووری رۆژهەڵاتی سووریا. وەک باست کرد، کێڵگە نەوتییەکان زیانیان پێگەیشتووە. کاتێک رێککەوتن لەنێوان دیمەشق، باکووری رۆژهەڵاتی سووریا و کۆمپانیاکاندا دەکرێت، ئەوکات کۆمپانیاکان دەتوانن پلانێکی بازرگانیی گونجاو دابنێن، چونکە دەزانن چەندە قازانج و رێژەیان دەستدەکەوێت لە بەرهەمهێنان و هەناردەکردنی نەوت. کۆمپانیا ئەمریکییەکان پارەیان هەیە و دەتوانن بە خێرایی ئەزموون و شارەزایی بهێنن بۆ باشترکردنی بیرە نەوتەکان. ئەوان شارەزایی ناوچەیی و ئەزموونی کارکردنیان لە هەرێمی کوردستانی عێراقیش هەیە. بۆیە ئەمە خێراترین رێگەیە بۆ زیادکردنی بەرهەمهێنانی نەوت و هەناردەکردنی، کە سوودی بۆ هەموو خەڵکی سووریا دەبێت.

 

 

مایڵز کاگنز: کاک دلبخوین، یەکێک لەو پەیامانەی کە من ئاراستەی ئەو کەسانەم کردووە، کە لە حکومەتی واشنتن دەیانناسم ئەوەیە، کە پێویستە ئەمریکا بەردەوام بێت لە هەبوونی سەربازی لە باکووری رۆژهەڵاتی سووریا. کۆمپانیاکەی من لەگەڵ کۆمپانیایەکی بیناسازیی کوردیدا کار دەکات بۆ پڕۆژەی دروستکردنی بنکەیەک لە نزیک حەسەکە و تل تەمەر. لەم بنکەیەدا سەربازی ئەمریکی هەن و ئێمە پڕۆژەی دروستکردنی سەنتەری ئۆپەراسیۆن و نەخۆشخانەمان هەیە. ئێمە پێمان وایە بەردەوامیی بوونی سەربازانی ئەمریکا و هاوبەشی لەگەڵ هێزەکانی سووریای دیموکرات (هەسەدە) بۆ تێکشکاندنی داعش، یارمەتیی هەموو خەڵکی سووریا و ناوچەکە و جیهان دەدات.