هەڵەیەک روویدا! دووبارە هەوڵبدە
.
رووداو دیجیتاڵ
لە گۆڕستانی موسەڵا و تەپە لە کەرکووک کێلی 60 گۆڕ دەشکێندرێت و چەند گۆڕێکیش شێوێنراون. بەهۆی رووداوەکەوە سەرۆکی لیژنەی مافی مرۆڤ لە پەرلەمانی عێراق سکاڵای تۆمارکردووە و داوا دەکات گۆڕستانەکان بپارێزرێن.
کێلی 15 گۆڕیان لە گۆڕستانی موسەڵا شکاندووە و 45ـەکەی دیکە لە گۆڕستانی تەپە شکێنراون، دانیشتووانی شوێنەکەش دەڵێن، کە تاوەکو ئێستا رووداوی لەوشێوەیە رووینەداوە.
نەجم ئەحمەد، یەکێکە لە گۆڕهەڵکەنەکانی کەرکووک و دەڵێت: "15 بۆ 16 ساڵە لەم گۆڕستانەی موسەڵا کاردەکەم، تائێستا شتی وامان نەبینیوە، لە بەیانییەوە تاوەکو کاژێر 06:00ـی ئێوارە لێرەم، کورد، عەرەب، کاکەیی و تورکمان لێرە هەن، تێکەڵاون، ئەو گۆڕە عەرەبە، ئەمانە کوردن تێکدراون، بەڵام دەست لەوانەی دیکە نەدراون."
لە گۆڕستانی (تەپە)ش، کورد، تورکمان و عەرەبی سنوورەکە بە خاکدەسپێردرێن، ئەو گۆڕانەشی لەم گۆڕستانە تێکدراون لە هەر سێ پێکهاتەکەن و نازانرێت کێ تێکی داون.
میران شێرزاد، گۆڕهەڵکەنە لە گۆڕستانی تەپە و گوتی: "ئەمە یەکەمجارە شتی وا ببینم، 25 ساڵە لێرە کار دەکەم و شتی وا نەبووە، هاتوون ئاگریان کردووەتەوە و خۆیان گەرم کردووەتەوە، ئەم گۆڕە بەم بەردە شکێنراوە، دواتر چوونەتە ئەوبەری گۆڕستانەکە و دوو سێ گۆڕی دیکەیان تێکداوە و لەوێش ئاگریان کردووەتەوە، واتا زۆر بە هێمنی کارەکەیان کردووە، هیچ ترسێکیان نەبووە، بەڵام زۆرترین گۆڕ لەم گۆڕستانە تێکدراوە."
سەرۆکی لیژنەی مافی مرۆڤ لە پەرلەمانی عێراق، سکاڵای یاسایی تۆمارکردووە و داوا دەکات گۆڕستانەکانی کەرکووک بپارێزرێن.
ئەرشەد ساڵحی، ئەندامی پەرلەمانی عێراق: "تاوەکو ئێستا رێکارێکی تووندی دیاریکراو نییە بۆ داڕشتنی یاسای پاراستنی گۆڕستانەکان، لە هەموو وڵاتان گۆڕستانێکی تایبەت هەیە، ناهێڵن کەسێک لەوێ بنێژرێت کە ناسراو و خەڵکی ئەو شوێنە نەبێت و بنەچە و شوناسی دیار نەبێت."
هەموو گۆڕەکان لە یەک کاتدا و بەبێ جیاکاری تێکدراون و هێشتا هیچ کەسێک لەسەر ئەو کارە دەستگیرنەکراوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ