رووداو دیجیتاڵ
بەربژێری هێزەکانی سووریای دیموکرات (هەسەدە) بۆ پۆستی پارێزگاری حەسەکە، رایگەیاند، لەنێوان هەسەدە و حکومەتی سووریا لەسەر دیاریکردنی ئەو بۆ ئەو پۆستە رێککەوتن کراوە و بۆ ئەو مەبەستەش دەچێتە دیمەشق.
یەکشەممە 1-2-2026 نوورەدین ئەحمەد، بەربژێری (هەسەدە) بۆ پۆستی پارێزگاری حەسەکە بە تۆڕی میدیایی رووداوی راگەیاند: "لەنێوان هەردوو لایەندا (هەسەدە و حکومەتی سووریا) لەسەر ناوی من بۆ وەرگرتنی پۆستی پارێزگاری حەسەکە، رێککەوتن کراوە."
ئەو بەربژێرەی هەسەدە ئاماژەی بەوەشکرد، چاوەڕوان دەکرێت لە ماوەی دوو رۆژی داهاتوودا سەردانی دیمەشق بکات و لەگەڵ ئەحمەد شەرع، سەرۆکی کاتی سووریا و بەرپرسانی حکومەتی سووریا کۆببێتەوە.
نوورەدین ئەحمەد پەیامێکی ئاراستەی کورد و دانیشتووانی ناوچەکە کرد و گوتی: "داوا لە خودای گەورە دەکەم لەم کارەدا، کە خێر بێت بۆ گەل و وڵاتەکەمان، سەرکەوتوومان بکات. سۆند دەخۆم کە دڵسۆزی خوێنی شەهیدانمان بم و بە هەموو توانایەکمەوە خزمەتی گەلەکەم و خەڵکی ناوچەکە بکەم."
سەبارەت بە ئەجێندای کارکردنی لە ئەگەری دەستبەکاربوونی، نوورەدین ئەحمەد گوتی: "کارە سەرەکییەکانم لەگەڵ لایەنە پەیوەندیدارەکان بۆ چەسپاندنی دادپەروەریی کۆمەڵایەتی، دابینکردنی ئاسایش، ئارامی و ئاشتی دەبێت بۆ کۆمەڵگەکەمان."
هەروەها جەختی لەوەش کردەوە کە "بەرەنگاربوونەوەی گەندەڵی و خزمەتکردنی هەموو پێکهاتەکان" بەشێکی سەرەکی دەبێت لە ستراتیژیی کارکردنی و دڵنیایی دا بە خەڵکی ناوچەکە کە "داهاتوو باشتر دەبێت."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ