رووداو دیجیتاڵ
گوتەبێژی بەڕێوەبەرایەتیی ئاوی دەوروبەری گەرمیان رایگەیاند، هەڵکەندنی پێنج بیری ئاویان لە سنووری قەزای کفری تەواو کردووە، کە یەکێک بوو لە داواکاریی مانگرتووانی قەزاکە، دەشڵێت: "ئێستا سەرقاڵی داپۆشینی بیرەکان و دواتر دروستکردنی شوێن دەبن بۆیان بۆ ئەوەی لە نزیکترین کاتدا بکەونە کار، کە بەشێکی زۆری گرفتی ئاوی قەزاکە چارەسەر دەکات."
رۆژی هەینی، 1-9-2023 سالار عەزیز، گوتەبێژی بەڕێوەبەرایەتیی ئاوی دەوروبەری گەرمیان، بە تۆڕی میدیایی رووداوی راگەیاند: "لەماوەکانی رابردوودا بە گوژمەی 800 ملیۆن دینار کە لەلایەن سەرۆکی حکومەتی هەرێمی کوردستان تەرخانکرا، پێنج بیرمان لە قەزای کفری لێدا بەمەبەستی کەمکردنەوەی شوێنەواری کەمئاوی و نەهێشتنی گرفتی بێ ئاوی."
سالار عەزیز گوتی: "هەڵکەندنى ئەو پێنج بیرە تەواو بووە، ئێستا سەرقاڵی تەواوکردنی کارەکانی دیکەین لە داپۆشین و رێکخستن و دروستکردنی شوێن بۆیان بۆ ئەوەی لە نزیکترین کاتدا بکەونە کار و خزمەتی دانیشتوانی قەزای کفری بکەن."
گوتەبێژی بەڕێوەبەرایەتی ئاوی دەوروبەری گەرمیان ئاماژەی بۆ ئەوەشکرد هەڵکەندنی ئەو بیرانە لەنێوان 120 بۆ 150 مەتر بووە و دەڵێت: "بە کەوتنەکاری ئەو پێنج بیرە تاڕادەیەکی زۆر گرفتی کەمئاوی لە قەزای کفری چارەسەر دەکرێت."
مانگی تەممووزی ئەمساڵ بەشێک لە دانیشتووانی قەزای کفری لە ئیدارەی سەربەخۆی گەرمیان بۆ داواکردنی خزمەتگوزاری و جێبەجێکردنی پڕۆژەکان بۆ قەزاکەیان دەستیان بە مانگرتن کرد و رۆژی 10ـی ئابی 2023 دوای ئەوەی بەشێک لە داواکارییەکانیان جێبەجێکرا، کۆتاییان بە مانگرتنەکەیان هێنا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ