ئەو کچەی ڤیدیۆی سەماکردنەکەی لە یانەیەکی شەوانەدا بڵاوبووەتەوە
رووداو دیجیتاڵ
قایمقامی هەولێر روونکردنەوە لەبارەی سەمای کچێکی منداڵ دەدات لە یانەیەکی شەوانەدا و دەڵێت، "ئەو یانەیە لە هەولێر نییە."
چەند رۆژێکە گرتەی کچێکی تەمەن 10-12 ساڵان بڵاوبووەتەوە کە لە یانەیەکی شەوانەدا سەما دەکات و دەنگۆی ئەوە بڵاوبووەوە کە ڤیدیۆکە لە یانەیەکی شەوانەی هەولێر تۆمارکرابێت.
لەوبارەوە، ئەمڕۆ شەممە 4-2-2023، نەبەز عەبدولحەمید، قایمقامی هەولێر بە تۆڕی میدیای رووداوی راگەیاند: دەنگۆی ئەوە هەبوو ئەو منداڵە لە یانەیەکی شاری هەولێر سەمای کردبێت، دوای بەدواداچوونی تەواو، دەرکەوت ئەو گرتە ڤیدیۆیە کۆنە و لە بەغداش تۆمار کراوە.
نەبەز عەبدولحەمید گوتی: هەر کارێکی لەو جۆرە لە پارێزگای هەولێر بکرێت، بەپێی یاسا شوێنەکە دادەخرێت و خاوەنەکەی سزای یاسایی دەدرێت.
لە سەرەتای مانگی کانوونی دووەمی 2023، لە تۆڕە کۆمەڵایەتییەکان گرتە ڤیدیۆیەک بڵاوبووەوە کە تێیدا منداڵێک لە یانەیەکی شەوانە پارە بەسەر سەماکەرێکی ئەو یانەیەدا هەڵدەدات و ئەوەش کاردانەوەی زۆری لای بەکارهێنەرانی تۆڕە کۆمەڵایەتییەکان دروستکرد.
رۆژی 3-1-2023، نەبەز عەبدولحەمید، قایمقامی قەزای ناوەندی هەولێر بە رووداوی راگەیاند، "دوای بڵاوبوونەوەی ڤیدیۆکە، وەزارەتی ناوخۆی عێراق، نووسینگەی سەرۆکی ئەنجوومەنی وەزیرانی هەرێمی کوردستان و سەرۆکی ئەنجوومەنی وەزیرانی عێراق و سەرجەم لایەنەکان داوای بەدواداچوونی بەپەلەیان کرد. توانیمان ئەو شوێنە بدۆزینەوە کە گرتە ڤیدیۆکەی لێ تۆمارکراوە."
نەبەز عەبدولحەمید گوتی: "دەستمانکرد بە گرتنەبەری رێکارە یاساییەکان و سەرەتا شوێنەکەمان داخست و بە نووسراو داوامان لە داواکاری گشتی کرد بۆ ئەوەی سکاڵای یاسایی دژی خاوەنی شوێنەکە و بەخێوکەری تۆمار بکات."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ