کوردستان
تورکیا دەڵێت، دانانی بەڕێوەبەرێکی ناتورکمان بووەتە هۆی دروستبوونی ناڕەزایەتی و نائومێدی لەنێو کۆمەڵگەی تورکماندا.
رووداو دیجیتاڵ
گوتەبێژی وەزارەتی دەرەوەی تورکیا، لەبارەی دانانی بەڕێوەبەرێکی کورد بۆ ناحیەی پردێی سەر بە پارێزگای کەرکووک، رایدەگەیێنێت، ئەو هەنگاوە "بووەتە هۆی دروستبوونی ناڕەزایەتی و نائومێدی لەنێو کۆمەڵگەی تورکماندا." هەروەها دەڵێت، وڵاتەکەی لە نزیکەوە چاودێریی پێشهاتەکان دەکات.
ئەمڕۆ هەینی، ئۆنجو کەچەلی، گوتەبێژی وەزارەتی دەرەوەی تورکیا، لە راگەیێندراوێکدا کە لە تۆڕی کۆمەڵایەتیی ئێکس بڵاوی کردووەتەوە، هەڵوێستی وڵاتەکەی لەبارەی رووداوەکانی چەند رۆژی رابردووی ناحیەی پردێ خستەڕوو.
کەچەلی نووسیویەتی: "چاوەڕوانیی سەرەکیمان ئەوەیە کە هاونیشتمانە تورکمانەکانمان بە شێوەیەکی شایستە لەناو پێکهاتەی سیاسی و دەوڵەتیی عێراقدا نوێنەرایەتی بکرێن."
گوتەبێژی وەزارەتی دەرەوەی تورکیا دەڵێت، پرسی نوێنەرایەتیی تورکمانەکان لە کەرکووک "گرنگییەکی تایبەتی هەیە،" بەتایبەت لە دانان و ئەرکپێسپاردنەکان لە هەموو دامەزراوە گشتییەکاندا و لە سەرووی هەمووشیانەوە لە ئەنجوومەنی پارێزگادا.
سەبارەت بە دانانی بەڕێوەبەری نوێی ناحیەی پردێ، کەچەلی دەڵێت: "دانانی بەڕێوەبەرێکی ناتورکمان بۆ ناحیەی پردێی کەرکووک، کە ناوچەیەکی تورکماننشینە، بە شێوەیەکی رەوا بووەتە هۆی دروستبوونی ناڕەزایەتی و نائومێدی لەنێو کۆمەڵگەی تورکماندا."
لە کۆتایی راگەیێندراوەکەدا، گوتەبێژەکەی وەزارەتی دەرەوەی تورکیا ئاماژەی بەوە کردووە کە "ئارامی و سەقامگیریی کەرکووک، کە بە عێراقێکی بچووککراوە دادەنرێت، کلیلی ئارامی و سەقامگیریی تەواوی عێراقە،" راشیگەیاندووە کە وڵاتەکەی "لە نزیکەوە و بە هەستیارییەوە چاودێریی پێشهاتەکانی کەرکووک دەکات."
ناحیەی پردێ دەکەوێتە باکووری رۆژئاوای کەرکووک و لە رووی ئیتنییەوە ناوچەیەکی تێکەڵە لە کورد، تورکمان و عەرەب. بەڵام تورکمانەکان وەکو ناوچەیەکی ستراتیژی خۆیان سەیری دەکەن.
هۆکاری گرژییەکان
رۆژی 24ی شوباتی 2024، راکان جبووری، پارێزگاری پێشووی کەرکووک بە وەکالەت، فەرمانێکی دەرکرد بۆ دانانی عەبدولموتەلیب نەجمەدین، کەسایەتییەکی کوردی سەر بە یەکێتیی نیشتمانیی کوردستان، وەک بەڕێوەبەری نوێی ناحیەی پردێ. ئەمەش لەکاتێکدا بوو کە بۆ ماوەیەک بەڕێوەبەری پێشووتر کە تورکمان بوو، بە وەکالەت کارەکانی رادەپەڕاند.
لایەنە سیاسییە تورکمانییەکان و بەشێک لە دانیشتووانی تورکمانی ناحیەکە، ئەم بڕیارەیان بە "سەپاندنی ئیرادەی سیاسی" و "پشتگوێخستنی مافی پێکهاتەی تورکمان" لەقەڵەم دا. ئەوان پێیانوابوو کە بەپێی دیمۆگرافیای ناحیەکە، دەبوو پۆستەکە بۆ تورکمانەکان بمێنێتەوە.
نیگەرانی تورکمانەکان جارێکی دیکە لە پردێ سەریهەڵدایەوە، ئەمەش دوای ئەوەی شارەوانییەکانی کەرکووک بڕیاری گۆڕینی سەرۆکشارەوانیی پردێی دا، کە کوردە و کوردێکی دیکە لە شوێنەکەی دانرا، بەڵام تورکمانەکانی شارۆچکەکە دژی ئەو گۆڕانکارییە وەستانەوە و خۆپێشاندانیان کرد.
تورکمانەکانی پردێ هەر بەوە نەوەستان، دوێنێ پێنجشەمممە بۆ سێیەم رۆژ لەسەر یەک خۆپێشاندانیان کرد و رێگەی سەرەکیی هەولێر - کەرکووکیان داخست. ئەمجارەیان ئاستی داواکارییەکانیان بەرزتر کردەوە و ئێستا داوای پۆستی بەڕێوەبەری ناحیەکە دەکەن.
لە بەرامبەر ئەم دۆخەدا، ئەنجوومەنی پارێزگای کەرکووک هاتە سەر هێڵ. لەسەر داوای نوێنەری تورکمان لە ئەنجوومەنەکە، بڕیاردرا بە پێکهێنانی لیژنەیەک بۆ تاوتوێکردنی کێشەکە و دۆزینەوەی چارەسەر.
بڕیارە لیژنەکە لە هەفتەی داهاتووەوە دەستبەکار بێت و تاوەکو ئەو کاتە، خۆپێشاندەران گەڕاونەتەوە بۆ شێوازی مانگرتن و رێگاکەیان کردووەتەوە.
پرسی دانانی بەڕێوەبەری ناحیەی پردێ لە بابەتێکی ئیدارییەوە بووە کێشەیەکی سیاسیی نێوان پێکهاتەکانی کەرکووک و کاردانەوەی هەرێمیی (وەک هەڵوێستی تورکیا) لێکەوتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ