رووداو دیجیتاڵ
کەشناسیی هەرێمی کوردستان دەڵێت، سبەی سێشەممە ئاسمانی هەرێمی کوردستان دەگۆڕێت بۆ هەوری تەواو. کەشناسێکیش دەڵێت، رۆژی دواتر شەپۆلێکی بارانبارینی لاواز بەشێکی هەرێمی کوردستان دەگرێتەوە و ئاماژە بەوەش دەکات، شەممەی داهاتوو شەپۆلێکی بارانی باش تەواوی هەرێمی کوردستان دەگرێتەوە.
رۆژی دووشەممە 04-12-2023 کەشناسیی هەرێمی کوردستان بڵاویکردەوە، ئەمڕۆ ئاسمان ساماڵ و پەڵەهەور دەبێت و پلەی گەرما نزیک دەبێتەوە لە پلەی گەرمای دوێنێ.
لەبارەی کەشوهەوای سبەی سێشەممەوە کەشناسی دەڵێت، ئاسمان ساماڵ دەبێت و شەوەکەی بۆ هەوری تەواو دەگۆڕێت.
محەممەد کەمال، شارەزای کەشناسی بە تۆڕی میدیایی رووداوی گوت، رۆژی چوارشەممە 06-12-2023 شەپۆلێکی بارانبارین بە لاوازی هەرێمی کوردستان دەگرێتەوە؛ زیاتر لە سنووری دهۆک کاریگەریی دەبێت و دواتر ناوچە شاخاوییەکانی هەولێر.
ئەو کەشناسە ئاماژەی بەوەش کرد، رۆژانی پێنجشەممە و هەینی ئاسمان ساماڵ دەبێت و رۆژی شەممە شەپۆلێکی بارانبارین تەواوی هەرێمی کوردستان دەگرێتەوە. گوتیشی، "زۆرترین باران لە پارێزگاکانی هەولێر و دهۆک دەبارێت؛ لە سلێمانی و هەموو ناوچەکانی دیکەش بارانی باش دەبارێت؛ تەنیا لە هەڵەبجە و گەرمیان کەمتر لە ناوچەکانی دیکە باران دەبارێت."
محەممەد کەمال ئاماژەی بەوەش کرد، بەهۆی شەپۆلەکەی رۆژی شەممەوە پلەی گەرما دادەبەزێت و لە تەواوی ناوچە شاخاوییەکانی هەرێمی کوردستان بەفر دەبارێت.
بەگوێرەی کەشناسیی هەرێمی کوردستان، بەرزترین پلەی گەرمای سبەی سێشەممە 05-12-2023 بەمشێوەیەی خوارەوە دەبێت:
هەولێر: 21 پلەی سیلیزی
سلێمانی: 20 پلەی سیلیزی
دهۆک: 21 پلەی سیلیزی
کەرکووک: 23 پلەی سیلیزی
هەڵەبجە: 19 پلەی سیلیزی
زاخۆ: 22 پلەی سیلیزی
گەرمیان: 25 پلەی سیلیزی
حاجی ئۆمەران: 13 پلەی سیلیزی
سۆران: 16 پلەی سیلیزی
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ