رووداو دیجیتاڵ
تاقیکردنەوەکانی کۆتایی وەرزی یەکەمی قوتابیان لە هەرێمی کوردستان بەڕێوەدەچێت. پەروەردەی سلێمانی دەڵێت، بایکۆت کۆتاییهاتووە و لەو سنوورەش تاقیکردنەوەکان لەکاتی خۆیدا دەکرێن.
دوێنێ هەڵسەنگاندن بۆ بازنەی یەکەمی قوتابیان کە پۆلەکانی یەک، دوو و سێ دەگرێتەوە، لە هەرێمی کوردستان دەستیپێکرد و بەردەوامە. بڕیارە 8ی ئەم مانگە تاقیکردنەوەی وەرزی یەکەم لە پۆلەکانی چوار بۆ 12ی بنەڕەتی لە سەرتاسەری هەرێمی کوردستان بکرێن.
ئەمڕۆ یەکشەممە بەرپرسێکی باڵا لە پەروەردەی سلێمانی بە تۆڕی میدیایی رووداوی گوت، "مامۆستایان گەڕاونەتەوە بۆ دەوام و لە 8ی مانگدا هاوشێوەی پارێزگاکانی دیکە تاقیکردنەوەکان لەکاتی خۆیاندا دەکرێن."
هەر ئەمڕۆ فەرهاد قادر، ئەندامی ئەنجوومەنی مامۆستایانی ناڕازی لە هەڵەبجە بە تۆڕی میدیایی رووداوی گوت، "بڕیارمان داوە نەبینە هۆکاری دواکەوتنی تاقیکردنەوەکان و بگەڕێینەوە بۆ ناوەندەکانی خوێندن."
هەروەها ئاوات محەممەد، یەکێک لە نوێنەرانی مامۆستایانی ناڕازی لە سلێمانی بە تۆڕی میدیایی رووداوی گوت، "مەرجی سەرەکیمان بۆ گەڕانەوە بۆ دەوام مووچەی مانگەکانی 10 و 11 بوو، دوای جێبەجێبوونی داواکانمان کۆتاییمان بە بایکۆت هێنا و ئامادەین بۆ تاقیکردنەوەکان."
لە 1ی کانوونی یەکەمی 2024ەوە بەشێکی مامۆستایان لە پارێزگاکانی سلێمانی و هەڵەبجە و هەردوو ئیدارەی سەربەخۆی گەرمیان و راپەڕین بایکۆتی دەوامیان کردبوو، بەڵام دەوام لە پارێزگاکانی هەولێر، دهۆک و ئیدارە سەربەخۆکانی ئەو دوو سنوورە ئاسایی بوو.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ