هەڵەیەک روویدا! دووبارە هەوڵبدە
رووداو دیجیتاڵ
وەزیری پێشمەرگە دەڵێت، کارەکانی یەکخستنەوەی هێزەکانی پێشمەرگە بەپێی پلان بەڕێوەدەچن و بەردەوامن. ئاماژە بەوەش دەکات، "تاوەکو کۆتایی 2026 یەکەی 70 و 80 دەچنە ژێر چەتری وەزارەتی پێشمەرگە."
رۆژی چوارشەممە، 5ی شوباتی 2025 شۆڕش ئیسماعیل، وەزیری پێشمەرگەی هەرێمی کوردستان بە تۆڕی میدیایی رووداوی راگەیاند، "کارەکانی یەکخستنەوەی هێزەکانی پێشمەرگە بەپێی پلان بەڕێوەدەچن و بەردەوامن، یەکخستنى پێشمەرگە بەشێکى سەرەکییە لە بەدەستهێنانى ئامانجەکانمان بۆ دروستکردنی سوپایەکی بەهێز و نیشتمانى."
بە گوتەی شۆڕش ئیسماعیل، پرۆسەى چاکسازى و یەکخستنى هێزى پێشمەرگە "قۆناخى دژوارى بڕیوە، هەنگاوى پێویستمان بۆ یەکخستنى هێزەکانى پێشمەرگە ناوە و بەردەوامیش دەبین لە ئامانجەکانمان."
وەزیری پێشمەرگە ئەوەی ئاشکرا کرد، "تاوەکو کۆتایی ساڵی 2026 هەموو هێزەکانی پێشمەرگە بە یەکەی 70 و 80ـشەوە یەکدەخرێن."
دوێنێ سێشەممە بە ئامادەبوونی نێچیرڤان بارزانی، سەرۆکی هەرێمی کوردستان و فەرماندەی گشتیی هێزی پێشمەرگە، رێوڕەسمی دەستبەکاربوونی فیرقەکانی 3 و 4ـی پیادەی وەزارەتی پێشمەرگە بەڕێوەچوو.
نێچیرڤان بارزانی باسی یەکخستنەوەی هێزەکانی پێشمەرگە و بەرەوپێشچوونەکانی لەم بوارە دا کرد. رایگەیاند "ئەم دەستکەوتە نیشانەی ئیرادەی پتەومان و بەرهەمی ئەو قوربانییە گەورەیە کە گەلی کوردستان و پێشمەرگە لەماوەی چەندین دەیە پێشکێشیان کردووە."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ