رووداو-هەولێر
وەزارەتی دارایی و ئابووریی هەرێمی کوردستان بە نووسراوێک داوا لە سەرجەم وەزارەت و فەرمانگەکانی نەبەستراو بە وەزارەتەکان دەکات رێگە بە فەرمانبەرانی پلە باڵا و تایبەت نەدەن جگە لە کەرتی گشتی لە کەرتی تایبەتیش کاربکەن، پەرلەمانتارێکیش دەڵێت: "لە هەرێمی کوردستان پلە باڵا و تایبەت هەن جگە لە کەرتی گشتی لە کەرتی تایبەتیش کاردەکەن."
بەپێی نووسراوی ژمارە 645ـی وەزارەتی دارایی و ئابووریی هەریمی کوردستان، کە رۆژی 29ـی حوزەیرانی ئەمساڵ بە واژۆی ئاوات شێخ جەناب، وەزیری دارایی ئاراستەی سەرجەم وەزارەت و فەرمانگەکانی نەبەستراو بە وەزارەتەکانەوە کراوە، هاتووە: "هاوپێچ لەگەڵ نووسراوماندا نووسراوی ئەنجوومەنی وەزیران ژمارە 6390 لە رۆژی 26ـی نیسانی 2022 بۆتان رەوانە دەکەین تایبەت بە کارنەکردنی فەرمانبەرانی پلە (تایبەت و باڵا) لە دوای دەوامی فەرمی لە کەرتی تایبەت تاوەکو لەو پلە و پۆستانەدابن."
رۆژی 26ـی نیسانی 2022، ئەنجوومەنی وەزیرانی هەرێمی کوردستان بە نووسراوی ژمارە 6390ـی داوای لە وەزارەتی دارایی کرد فەرمانبەرانی پلە تایبەت و پاڵا بەهیچ شێوەیەک نابێت لە کەرتی تایبەت کاربکەن تاوەکو بە فەرمی لەو پۆستەدا بن.
رۆژی هەینی، 5ـی ئابی 2022، عومەر گوڵپی، ئەندامی لێژنەی دارایی و کاروباری ئابووریی پەرلەمانی کوردستان، لەبارەی نووسراوەکەوە بە تۆڕی میدیایی رووداوی راگەیاند: "راستییەکەی ئەو بابەتە بەپێی یاسا دیاریکراوە کە نابێت پلەی تایبەت و پلە باڵاکان لە هەرێمی کوردستان کاری دیکەیان لە کەرتی تایبەت هەبێت، بەنموونە لە کۆمپانیایەک کاربکەن یان شتی دیکە، بەڵام لە هەرێمی کوردستان ئەوە هەیە."
عومەر گوڵپی گوتیشی: "هۆکاری ئەو بڕیارە ئەوەیە کە پلەی باڵا و تایبەت کە مووچەیان باشە، دەبێت خۆیان بۆ کاری حکومەت و ئەرکەکانیان تەرخان و یەکلایی بکەنەوە، بە نموونە بەڕێوەبەرێکی گشتی نزیکەی سێ ملیۆن دینار وەردەگرێت بۆ ئەوەیە تەواو خۆی بۆ فەرمانگەکەی و کارەکانی تەرخان بکات."
بەپێی قسەی ئەو پەرلەمانتارە، لە هەرێمی کوردستان 350 تاوەکو 400 پلە باڵا و تایبەت هەن، پلە باڵاکان ئەو کەسانەن کە یان هەڵدەبژێردرێن یان متمانەیان پێدەدرێت، وەکو وەزیر، سەرۆکایەتییەکان، سەرۆکی هەرێمی کوردستان و سەرۆکی حکومەت و ئەوانە، هەرچی پلە تایبەتە بریکاری وەزیر، راوێژکار و بەڕێوەبەرر گشتییەکان دەگرێتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ