کەنەکە: هێرشەکانی سەر هەرێمی کوردستان پێشێلکردنی یاسای نێودەڵەتییە و ئەرکی بەغدایە رایبگرێت

 

 

کۆنگرەی نەتەوەیی کوردستان (کەنەکە) لە راگەیێندراوێکدا رایگەیاند، "هەرچەندە کوردستان بەشێک لەم شەڕی هەژموانگەریی و دەسەڵاتخوازییە نییە، بەڵام جوگرافیای کوردستان بە گشتیی لە ناوجەرگەی ئەو شەڕ و ململانێیانەدایە، پێویستە لەم قۆناخە ئاڵۆزەدا پاراستنی کوردستان و بەرژەوەندیی خەڵکی کوردستان ئەرکی لەپێشینەی هەمووان بێت".

 

کۆنگرەی نەتەوەیی کوردستان (کەنەکە) راگەیێندراوەکەی بە بۆنەی ساڵیادی راپەڕینی باشووری کوردستان لە ساڵی 1991 بڵاوکردەوەتەوە، لەنێویدا باسی دۆخی ئەمڕۆی ناوچەکەی کردووە و رایگەیاندووە، "رۆژهەڵاتی کوردستان راستەوخۆ لەناو ئاگری شەڕەکەدایە، بۆیە مامەڵەکردن لەگەڵ دۆخەکە هەستیار و هۆشیارییەکی زۆری گەرەکە، دەشێ دەرفەتێکی باشیش بێت بۆ قۆناخێکی باشتر بۆ رۆژهەڵاتی وڵات".

 

لە بەشێکی دیکەی راگەیێندراوەکەی کەنەکەدا هاتووە: "پێویستە لایەنە سیاسییەکانی کوردستان و خەڵکی کوردستان بە هەموو چین و توێژەکانییەوە بە هەستیاریی و جیهانبینینییەک لە دۆخەکە بڕوانن، کە ئێستا و داهاتووی کوردستان بگاتە قۆناخ و دۆخێکی باشتر. بۆ ئەو مەبەستەش پارت و لایەنە سیاسیی و مەدەنییەکان و تەواوی خەڵکی کوردستان ئەرکدارن کە یەکێتی و یەکڕیزیی ناوخۆیی کوردستان پتەو بکەن و پێکەوە کێشە و قەیرانە ناوخۆییەکان تێپەڕینن و قۆناخەکە بکەنە دەرفەتێکی بەرهەمدار".

 

کەنەکە داوایەکی ئاراستەی حکومەتی عێراق و هەرێمی کوردستان کردووە و رایگەیاندووە: "پریشکی ئاگرەکە عێراق‌ و هەرێمی کوردستانیشی گرتووەتەوە، بۆیە ئەرکی دەسەڵاتدارانی بەغدا و هەرێمی کوردستانە هەموو رێگەیەک بگرنەبەر تاوەکو ئاگری شەڕ دووربخەنەوە و لەمە زیاتر ژیان و سەلامەتی هاووڵاتییان نەکەونە مەترسییەوە. بە تایبەتی ئێستا رۆژانە شارەکانی هەولێر و سلێمانی دەکەونە بەر هێرشی مووشەک و درۆن، ئەرکی دەسەڵاتی بەغدایە سەروەری‌ خاکی عێراق ‌بپارێزێت و رێگە نەدات هیچ گرووپێکی چەکدار لە رێگەی شەڕی وەکالەتەوە هەرێمی کوردستان بکاتە ئامانج و ژیانی مەدەنی بکاتە قوربانی خواستەکانی خۆی".

 

لە بەشێکی راگەیێندراوەکەدا کەنەکە هێرشەکانی سەر هەرێمی کوردستان "بە تووندی سەرکۆنە" دەکات و دەڵێت: "تێوەگلاندنی ناوچە سڤیلییەکان لە ململانێیەکدا کە گەلی ئێمە تێیدا لایەن نییە، پێشێلکردنی ئاشکرای یاسا نێودەوڵەتییەکان و بنەماکانی مافی مرۆڤە و بە هیچ جۆرێک قبوڵکراو نییە".

 

کۆنگرەی نەتەوەیی کوردستان (کەنەکە)  24ی ئایاری 1999 لە کۆنفرانسێکی گشتیدا بە ئامادەبوونی 700 نوێنەر و میوانی کورد و بیانی لە هۆڵەندا وەکو دامەزراوەیەکی سیاسی راگەیێندرا.

 

کەنەکە لەسەر داوا و دەستپێشخەری پارتی کرێکارانی کوردستان (پەکەکە) راگەیەنرا؛ ئێستا جگە لە پارچەکانی دیکەی کوردستان، بەشێکی پارتەکانی هەرێمی کوردستانیش تێیدا ئەندامن.