ئۆتۆمبێلێک لە چەمانکێ دەکرێتە ئامانج و گەنجێک دەکوژرێت

 

بۆردوومانەکە دەوروبەری کاژێر 05:00ـی ئەم ئێوارەیە بووە و ئەو کەسەی گیانی لەدەستداوە ناوی ئالان ئیسماعیلە؛ ئەو کەسەی دیکەش کە بریندار بووە ناوی (هاشم شاکر)ـە.

بەپێی زانیارییەکانی رووداو کە لە کەسوکاری ئالانەوە دەستی کەوتووە، ئەو دوو کەسە خەڵکی گوندی خالەتانن لە نزیک ناحیەی سەرسنگ. ئەو کەسەی برینداریش بووە، کوڕی موختاری گوندەکەیە.

 

هەر بەپێی زانیاریی کەسوکارەکەی، ئالان چەند مانگێکە ژیانی هاوژینی پێکهێناوە.

 

مامێکی ئەو گەنجەی گیانی لەدەستداوە بە رووداوی راگەیاند، "کەس نازانێت چییە، بۆردوومان دەکرێت و کەس ناپرسێت بۆ، کەسیش پێی نەگوتووین ئەو ناوچەیە ناوچەی قەدەخەکراوە و مەچن. ئێمە بۆ سەیران و گەڕانیش دەچینە ئەو گوندە، ئەوانەی کراونەتە ئامانجیش هەر بۆ سەردانی گوندەکە چوون کە رەز و سماقی لێیە."

ئەمە یەکەم جار نییە سنووری ئەو گوندە بۆردوومان دەکرێت کە بەپێی گوتەی بەرپرسانی ناوچەکە لەلایەن تورکیاوە بۆردوومانەکە کراوە. شایەتحاڵێکیش بە رووداوی راگەیاند، "ناتوانین بچینە گوندەکەی خۆمان، چی بکەین. فڕۆکە هێرشی کردەسەرمان و دوو سێ جار بۆردوومانی ئەو ناوچەیەی کرد تاوەکو کەسێک گیانی لەدەستدا و کەسێکیش برینداربوو."

بریندارەکە لە نەخۆشخانەی فریاکەوتنە و لەژێر چاودێریی پزیشکیدایە.