رووداو دیجیتاڵ
هاوسەرۆکی مانگی سووری کوردی رایدەگەیێنێت، دۆخی مرۆیی لە گەڕەکە کوردنشینەکانی حەلەب "زۆر مەترسیدارە"؛ گەورەترین نەخۆشخانەی ناوچەکە بۆردوومان کراوە و نەخۆشخانەکانی دیکەش تەنیا 20٪ـی توانای کارکردنیان ماوە.
هەدیە عەبدوڵڵا، هاوسەرۆکی رێکخراوی مانگی سووری کوردی لە ئیدارەی خۆسەری باکوور و رۆژهەڵاتی سووریا، لە کاتی بەشداریکردنی لە بەرنامەی (رووداوی ئەمڕۆ)ـی تۆڕی میدیایی رووداو، زانیاریی وردی لەبارەی دۆخی گەڕەکەکانی شێخ مەقسوود و ئەشرەفییە خستەڕوو.
سەبارەت بە دۆخی نەخۆشخانەکان، هەدیە عەبدوڵڵا گوتی: "لەو ناوچەیە 5 نەخۆشخانە هەن، گەورەترین نەخۆشخانە بەناوی (عوسمان) کراوەتە ئامانج و بۆمبی بەرکەوتووە."
گوتیشی: "بەهۆی نەبوونی کارەبا و سووتەمەنییەوە نەخۆشخانەکان ناتوانن 20٪ـی خزمەتگوزارییە تەندروستییەکان دابین بکەن، هاوکات قەیرانی دەرمان هەیە و کەمتر لە 40٪ـی دەرمان و پێداویستیی پزیشکی لەبەردەست ماوە."
هاوسەرۆکی مانگی سووری کوردی ئاماژەی بەوە کرد، تاوەکو ئێستا 7 کەس کوژراون و تەنیا تیمەکانی ئەوان 54 برینداریان گواستووەتەوە کە سەرجەمیان سڤیلن و ژن و منداڵیان تێدایە. باسی لەوەش کرد: "گرووپە چەکدارەکان رێگە نادەن تیمە فریاگوزارییەکان بەهانای بریندارانەوە بچن."
دەربارەی هەوڵەکانیان بۆ وەرگرتنی هاوکاری، هەدیە عەبدوڵڵا گوتی: "داوای هاوکاریمان لە مانگی سووری عەرەبی کردووە، بەڵام بەهۆی چڕیی بۆردومانەکان و مەترسی لەسەر ژیانیان، ئامادە نین تیمەکانیان بنێرنە ناوچەکە."
بە گوێرەی لێدوانی هەدیە عەبدوڵڵا، ئەوان 10 بنکەی تەندروستییان لە شێخ مەقسوود و ئەشرەفییە جێگیر کردووە، بەڵام بەهۆی زۆریی ژمارەی بریندار و سەختیی برینەکانیان کە پێویستیان بە نەشتەرگەرییە، ئەو بنکانە توانای کۆنترۆڵکردنی دۆخەکەیان نییە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ