هەڵەیەک روویدا! دووبارە هەوڵبدە
ژن و منداڵانی داعش لە کەمپی رۆژ
رووداو دیجیتاڵ
دوای 10 ساڵ لە کۆتاییهاتنی خەلافەتەکەیان، هێشتا چارەنووسی هەزاران ژن و منداڵی داعش لە کەمپی رۆژی رۆژئاوای کوردستان نادیارە. ئەوان هەڵگری رەگەزنامەی نزیکەی 50 وڵاتی جیاوازن و هەندێکیان تامەزرۆی گەڕانەوەن بۆ وڵاتەکانیان، هەندێکیشیان هێشتا بیری تووندئاژۆیی لە مێشکیاندا ماوە.
دیوارێکی درێژ جیهانی دەرەوە لەم جیهانە بچووکەی نێو کەمپی رۆژ جیادەکاتەوە. ئاڵما ئیسماعیلۆڤ، ژنێکی 43 ساڵانی خەڵکی سڕبیایە و دایکی 4 منداڵە؛ دووانیان لە چەکدارێکی داعشی بۆسنی و دووەکەی دیکەشی لە دوو چەکداری عێراقی و سعودین.
ئاڵما بە رووداوی گوت: "ساڵی 2014 لەگەڵ خێزانەکەم هاتین بۆ سووریا. هاوژینەکەم خەڵکی بۆسنە بوو و کوژرا؛ دوای کوژرانی منداڵەکانم هەڵگرت و لەنێو داعش دەرچووم. ساڵی 2016 هاتم بۆ ئێرە و 7 ساڵە لێرەم."
ئەو ژنە سڕبییە دوای کوژرانی هاوژینی یەکەمی، شووی بە چەکدارێکی عێراقی کردووەتەوە کە ئەویش کوژراوە. ئێستا تەنیا داواکاریی ئەوەیە بگەڕێتەوە وڵاتەکەی: "ئێمە زۆر ماندوو بووین، دەمەوێت لەگەڵ منداڵەکانم بگەڕێمەوە بۆ سڕبیا."
ساجیدە عەلی، تەمەن 52 ساڵ و خەڵکی ئۆزبەکستانە و دایکی 10 منداڵە. ئەویش هاوشێوەی ئاڵما دەیەوێت بگەڕێتەوە. ساجیدە دەڵێت: "سەرەتا لە تورکیا بووین، بەهۆی گرانییەوە هاتین. تەنیا ساڵێک لەگەڵ داعش بووم و دوای ئەوەی بینیمان هەموو شتێک هەڵەیە و زوڵم هەیە، هاتینە ئێرە. دەمەوێت بگەڕێمەوە لای دایک و باوکم کە بەتەمەنن و نەخۆشن."
ئیلیسا واکف، ژنێکی 36 ساڵانی خەڵکی ئازەربایجانە و بە ترسەوە لەنێو خێوەتەکەیەوە قسەی بۆ رووداو کرد. ئەو دەڵێت ساڵی 2015 چووەتە سووریا و هاوژینەکەی ناوی "جاوید حوسێنۆف"ـە.
ئیلیسا دەڵێت: "بەڵێ دەمەوێت بگەڕێمەوە وڵاتەکەم. کچەکەم دەیەوێت بچێتە قوتابخانە و ببێتە پزیشک؛ خۆشم بەرگدوورم و دەمەوێت ژیانێکی نوێ دەستپێبکەم."
سەرباری ئەمانە، هێشتا بەشێک لە ژنانی کەمپەکە نایانەوێت بگەڕێنەوە وڵاتەکانیان و هەڵگری بیری تووندئاژۆیین. ژنێکی خەڵکی ماڵدیڤ کە دایکی سێ منداڵە، ئامادە نەبوو قسە بکات و گوتی: "دەترسم لە خەڵک و لە هەموو کەس."
پەیامنێری رووداو لە کەمپەکەوە دەڵێت: "ئێرە زۆنێکی مەترسیدارە، چونکە بەشێک لە دانیشتووانەکەی هێشتا بیری تووندئاژۆییان هەیە و رێکخستنی نهێنییان بۆ پەروەردەکردنی نەوەیەکی نوێ لەسەر رێچکەی باوکە کوژراوەکان داناوە."
لە کەمپی رۆژ 2201 ژن و منداڵ دەژین، کە منداڵان سێ بەشی ژمارەکە پێکدەهێنن. دوای ئەوەی کەمپی هۆڵ کەوتە ژێر دەسەڵاتی سوپای عەرەبیی سووریا، ئێستا رۆژ تاکە کەمپی ژن و منداڵانی داعشە لە رۆژئاوای کوردستان کە شەڕڤانان دەیپارێزن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ