حکومەتی سووریا کارەکانی لە فڕۆکەخانەی قامشلۆ و دەروازەی سێمالکا دەستپێدەکات
رووداو - حەسەکە
باڵەخانەی پارێزگای حەسەکە، تەنیا ئاڵای سووریای لەسەر بەرزکراوەتەوە، سیمای کوردیی لە شارەکە و ئاڵای کوردستان تێیدا وەک خۆیان ماونەتەوە. شاندێکی وەزارەتی ناوخۆی سووریا، بە مەبەستی جێبەجێکردنی رێککەوتنی نێوان هێزەکانی سووریای دیموکرات (هەسەدە) و دیمەشق، سەردانی پارێزگاری نوێی حەسەکەیان کرد و پلانی داهاتوویان ئاشکرا کرد.
مەروان ئەلعەلی، بەڕێوەبەری ئاسایشی ناوخۆی حکومەتی کاتیی سووریا لە لێدوانێکدا رایگەیاند: "بە پشتیوانی خودا، هەنگاوی داهاتوو وەرگرتنی فڕۆکەخانەی قامیشلۆ و کێڵگە نەوتییەکانی رمێلان دەبێت. سوپا لە شارەکان دەکشێتەوە و دەگەڕێتەوە بۆ خاڵەکانی خۆی؛ هەردوولا لە ناو شارەکان پاشەکشە دەکەن بۆ ئەوەی هیچ گرژی و ئاڵۆزییەک دروست نەبێت."
شاندەکەی حکومەتی سووریا ئاماژە بەوە دەدەن، کارەکانیان لە فڕۆکەخانەی نێودەوڵەتیی قامشلۆ دەستپێدەکەن و دواتر سەردانی دەروازە سنوورییەکان و بیرە نەوتەکانی رمێلان دەکەن. لای خۆشییەوە، بەڕێوەبەریی خۆسەر جەخت دەکاتەوە کە هەموو ئەم کارانە بە شێوەی هاوبەش ئەنجام دەدرێن.
خالید ئیبراهیم، ئەندامی دەستەی جێبەجێکاری پەیوەندییەکانی دەرەوە لە بەڕێوەبەریی خۆسەر دەڵێت: "هەمووان دەزانن دەروازەی سێمالکا بەپێی رێککەوتنی نێوان هەرێمی کوردستان و بەڕێوەبەریی خۆسەرە؛ ئەم دەروازەیە وەک خۆی دەمێنێتەوە و تەنیا چەند فەرمانبەرێکی حکومەتی لێ جێگیر دەکرێت."
خاڵێکی دیکەی گرنگی رێککەوتنەکە، گەڕانەوەی ئەو ئاوارە کوردانەیە کە بە زۆرەملێ لە عەفرین و سەرێ کانی دەرکراون. هەرچەندە چاوەڕوانیی ئاوارەکان درێژەی کێشاوە، بەڵام هەردوولا دووپاتی دەکەنەوە کە جێبەجێکردنی تەواوی خاڵەکانی ئەم رێککەوتنە، پێویستی بە مانگێک تاوەکو دوو مانگ کات هەیە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ