باوکی ئەو کچە کوردەی لە لازقیە کوژرا چیرۆکی کوژرانی کچەکەی باس دەکات
رووداو دیجیتاڵ
باوکی ئەو کچە کوردەی ئەم بەیانییە لە شاری لازقیەی سووریا کوژرا دەڵێت، سبەی تەرمەکە دەگەڕێننەوە قامشلۆ و لە رۆژئاوای کوردستان بە خاکی دەسپێرن.
عادل کشۆ، باوکی شیندا، ئەو کچە کوردەی ئەم بەیانییە لە شاری لازقیەی سووریا کوژرا، لە کاتی بەشداریکردنی لە بووڵتەنی کاژێر 19:00ی تۆڕی میدیایی رووداو کە نالین حەسەن پێشکێشی کرد، رایگەیاند، شەوی رابردوو بۆ چەندین کاژێر شەڕ لە لازقیە لەنێوان هێزەکانی ئێستای دەسەڵاتی سووریا و پاشماوەی هێزەکانی دەسەڵاتی ئەسەد بەردەوام بوو.
عادل کشۆ گوتی، شیندا لەگەڵ خوشکێکی لە شوقەیەک دەمانەوە. شیندا قۆناخی یەکەمی کۆلێژی پزیشکی و خوشکەکەیشی قۆناخی سێیە.
باوکی کچە کوردەکە گوتی، لەگەڵ دەستپێکردنی شەڕەکە لەگەڵ هەردوو کچەکەی قسەی کردووە و پێی گوتوون، دەبێت هۆشیارانە مامەڵە بکەن، چونکە ئەوەی روودەدات شەڕە و هەربۆیە دەبێت خۆیان بپارێزن.
عادل کشۆ گوتی، شەڕە سەختەکە کاژێر 1ی بەرەبەیان تەواو بووە، بەڵام نزیک کاژێر 4ی بەرەبەیان گوللەیەکی وێڵ بەر شیندا کەوتووە و بەو هۆیەوە گیانی لەدەستداوە.
عادل کشۆ گوتی، شیندا تەنیا 20 رۆژ بوو گەڕابووەوە لازقیە، چونکە دوای ئەوەی وەرزی یەکەمی خوێندنی تەواو کرد، گەڕایەوە قامشلۆ و چەند رۆژێک مایەوە.
چەند کەسێک چوونەتە لازقیە بە مەبەستی گەڕاندنەوەی تەرمی شیندا. باوکی گوتی، سبەی تەرمەکە دەگەڕێننەوە و لە قامشلۆ بە خاکی دەسپێرن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ