رووداو دیجیتاڵ
وەزارەتی پەروەردەی هەرێمی کوردستان رایگەیاند، قوتابیان و خوێندکارانی پۆلی 12ی ئامادەیی (سەرجەم بەشەکان) دەتوانن لە رێگەی لینکێکەوە شوێن و هۆڵی تاقیکردنەوە وزارییەکانی ساڵی خوێندنی 2024-2025 (خولی یەکەم) بەپێی پارێزگاکان بزانن.
بە گوێرەی راگەیێندراوەکەی وەزارەتی پەروەردە، یەکەم تاقیکردنەوەی وزاری لە 1ـی حوزەیرانی 2025، کاژێر 07:30ـی بەیانی بەڕێوەدەچێت.
وەزارەتەکە داوا لە قوتابییان دەکات رۆژێک پێش ئەو وادەیە، واتە رۆژی 31ی ئایاری 2025، سەردانی هۆڵەکانی تاقیکردنەوە بکەن بۆ دڵنیابوونەوە لە شوێن و ناویان.
وەزارەتی پەروەردە ئاماژەی بەوەشکردووە، هەر قوتابییەک هەڵەیەک لە زانیارییەکانی وەک زمانی خوێندن یان ئاییندا هەبێت، پێویستە "بە زووترین کات" سەردانی بەڕێوەبەرایەتیی پەروەردەی تایبەت بە خۆی بکات بۆ راستکردنەوەی زانیارییەکان.
ئەو هەنگاوەی وەزارەت بۆ ئەوەیە کە قوتابییان پێشوەختە ئاگاداری شوێنی ئەنجامدانی تاقیکردنەوەکانیان بن و "هیچ گرفتێکیان" بۆ دروست نەبێت لە رۆژی تاقیکردنەوەدا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ