کوردستان
ئەو دیمەنەی کە بڵاوکراوەتەوە و پێنج بەرپرسی ئەمنیی خورماتوو سوکایەتی بە ئاڵای ئەمریکا دەکەن.
رووداو دیجیتاڵ
وەزیری ناوخۆی عێراق بڕیاری دا پێنج بەرپرسی باڵای ئەمنیی قەزای خورماتوو لە پۆستەکانیان دووربخاتەوە، دوای ئەوەی لە رێوڕەسمی عاشوورادا بە پێ بەسەر ئاڵای ویلایەتە یەکگرتووەکانی ئەمریکادا رۆیشتن و وێنەکانیان لە بەشێک لە میدیا و لە تۆڕە کۆمەڵایەتییەکان بڵاوبووەوە.
کەریم شوکر، پەرلەمانتاری عێراق لە فراکسیۆنی یەکێتیی نیشتمانیی کوردستان لە سنووری قەزای خورماتوو، ئەمڕۆ دووشەممە، 7ـی تەمموزی 2025، هەواڵەکەی بۆ تۆڕی میدیایی رووداو پشتڕاستکردەوە و رایگەیاند: "لە رێوڕەسمی عاشوورادا ئەو ئەفسەرانە بە پێ بەسەر ئاڵای ئەمریکادا رۆیشتوون، بۆیە عەبدولئەمیر شەمەری، وەزیری ناوخۆی عێراق، بڕیاری دوورخستنەوەیانی دەرکردووە."
ئەفسەرە دوورخراوەکان پێکدێن:
- لیوا حوسێن عەلی رەشید، بەڕێوەبەری پۆلیسی قەزای خورماتوو.
- عەمید موحسین سەفەر ئامرلی، فەرماندەی فەوجی حەوتی فریاکەوتن.
- عەمید سامر، بەڕێوەبەری بەشی رووبەڕووبوونەوەی ماددە هۆشبەرەکان.
- عەقید فەیسەڵ یونس ئیبراهیم ئامرلی، بەڕێوەبەری بنکەی پۆلیسی خورماتوو.
- عەقید محەممەد ئیسماعیل، بەڕێوەبەری پۆلیسی هاتووچۆی خورماتوو.
یاسین داودی، ئەندامی ئەنجوومەنی پارێزگای سەلاحەدین لە فراکسیۆنی یەکێتی، ئەمڕۆ دووشەممە بە تۆڕی میدیایی رووداوی گوت: "ئەو ئەفسەرانەی کە دوورخراونەتەوە، هەموویان لە نەتەوەی تورکمان و عەرەبن و هیچ کوردێکیان تێدا نییە."
لە وێنە بڵاوکراوەکاندا، زولفەقار حەیدەر سەلمان، قایمقامی قەزاکەش دەردەکەوێت، بەڵام یاسین داودی گوتی: "تائێستا روون نییە بڕیاری دوورخستنەوە قایمقامی خورماتووش دەگرێتەوە یان نا."
کاوە شێخانی، راوێژکاری پارێزگاری سەلاحەدین ئەمڕۆ دووشەممە بە تۆڕی میدیایی رووداوی گوت: لە وەزارەتی ناوخۆی عێراق لیژنەیەکی لێکۆڵینەوەیان لەسەر پێکهێنراوە و لە پۆستەکانیان دوورخراونەتەوە.
لەبارەی دەرفەتی گەڕانەوەی پۆستەکان بۆ کورد، کەریم شوکر، پەرلەمانتاری عێراق، بە رووداوی گوت: "دوورخستنەوەی ئەو بەرپرسە ئەمنیانە دەرفەتێکی باشە بۆ ئەوەی داوا بکەین یەکێک لە پۆستەکان بدرێتە کورد و کاری بۆ دەکەین." بەڵام یاسین داودی دەڵێت، "کێشەی سەرەکی ئەوەیە کە ئەفسەری باڵای کوردمان لەو ناوچەیە نییە، بۆ وەرگرتنی ئەو پۆستانە."
قەزای خورماتوو دەکەوێتە سنووری پارێزگای سەلاحەدین و یەکێکە لە ناوچە کوردستانییەکانی دەرەوەی ئیدارەی هەرێمی کوردستان. دوای رووداوەکانی 16ـی ئۆکتۆبەری 2017، کورد زۆربەی پۆستە کارگێڕی و ئەمنییەکانی لە قەزاکە لەدەستداوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ