هەڵەیەک روویدا! دووبارە هەوڵبدە
رووداو - دهۆک
لە ماوەی ساڵێکدا چوار کەسی ناسراوی دهۆک بەهۆی بەکارهێنان یان بازرگانیکردن بە مادەی هۆشبەر دەستگیر کراون.
سەرچاوەیەک لە فەرمانگەی نەهێشتنی مادەی هۆشبەر لە دهۆک بە تۆڕی میدیایی رووداوی راگەیاند، کاژێر 01:30 خولەکی شەوی رابردوو لەکاتی بازرگانیکردن بە مادەی هۆشبەر، کەسێکی دیاری سۆشیاڵ میدیایان دەستگیر کردووە.
بە گوتەی سەرچاوەکە، ئەو کەسە بڕێک مادەی هۆشبەری پێبووە و ویستوویەتی لە دهۆک بڵاویبکاتەوە، بەڵام تیمەکانیان دەستگیریان کردووە و پەڕاوی لێکۆڵینەوەیان بۆ کەیسەکە کردووەتەوە.
هەروەها ئەو سەرچاوەیە گوتیشی، بەپێی یاسا سزای بازرگانیکردن بە مادەی هۆشبەر لەنێوان سێ بۆ 15 ساڵدایە؛ ئەمەش دەوەستێتە سەر جۆر و بڕی مادەکە، لەگەڵ شێوازی بازرگانیکردنەکە.
بەپێی زانیارییەکانی رووداو، ئەمە چوارەم کەسی دیاری دهۆکە لە ماوەی ساڵێکدا بە تۆمەتی بەکارهێنان یان بازرگانیکردن بە مادەی هۆشبەر دەستگیر بکرێن.
ئامارەکانی فەرمانگەی نەهێشتنی مادەی هۆشبەر لە دهۆک دەریدەخەن، لە ساڵی رابردوودا 400 کەس بەهۆی بازرگانی و بەکارهێنانی مادەی هۆشبەر دەستگیر کراون؛ 75% لەوانە بەکارهێنەرن، لەنێویشیاندا 15 ئافرەت هەن و ئەوانی دیکە بازرگانن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ