هەڵەیەک روویدا! دووبارە هەوڵبدە
کوردستان
ئەسعەد محەممەدی، ئەو هاونیشتمانییەی لە بۆردوومانی ئەمریکا و ئیسرائیل بۆ سەر پاوە گیانی لەدەستدا.
رووداو دیجیتاڵ
لە بۆردوومانی ئەمریکا و ئیسرائیل بۆ سەر پاوە کەسێک گیانی لەدەستدا و 23ـی دیکەش بریندار بوون، رۆژی یەکشەممە 8-3-2026 چەندین شاری پارێزگای کرماشان بۆردوومانکران.
هاونیشتمانیەک لە شاری پاوەی پارێزگای کرماشان بە تۆڕی میدیایی رووداوی راگەیاند، "کاژێر 17:00ی ئێوارەی ئەمڕۆ یەکشەممە، بنکە و بارەگای سوپای پاسداران لە ناو شاری پاوە کراونەتە ئامانج و بەو هۆیەوە کەسێك گیانی لەدەستدا."
ئەو هاونیشتمانییە دەڵێت، "ئەو کەسەی گیانی لەدەستدا ناوی ئەسعەد محەممەدییە، لە کاتی هێرشەکان لە شوێنی کاری خۆی و لە ناو دووکانەکەی بووە و بەر بۆردوومان کەوتووە و گیانی لەدەستداوە."
بەپێی قسەی ئەو هاونیشتمانییە، هەر لە بۆردوومانەکەی سەر شاری پاوە 23 کەسی دیکەش بریندار بوون و برینی بەشێکیان سەختە.
بە گوتەی ئەو هاونیشتمانییە، ئێوارە ئەمڕۆ چەند جارێک شارەکانی پارێزگای کرماشان کراونەتە ئامانج و تاوەکو ئێستاش دەنگی فڕۆکە لە ئاسمانی شارەکانی پارێزگای کرماشان دەبیسترێت.
لە بەرەبەیانیی رۆژی شەممە 28ـی شوباتەوە، هێرشێکی بەرفراوان و هاوبەشی ئیسرائیل و ئەمریکا بۆ سەر ئێران دەستیپێکردووە، لەو ماوەیەدا چەندین جار پارێزگاکانی رۆژهەڵاتی کوردستانیش کراونەتە ئامانج.
لە بەرامبەردا، هێزە چەکدارەکانی ئێران و بەتایبەت سوپای پاسداران، بە چەندین مووشەک و درۆن هێرشیان کردووەتە سەر ئیسرائیل و بنکە سەربازییەکانی ئەمریکا لە ناوچەکەدا.
بەگوێرەی دوایین ئاماری دامەزراوەی شەهید و کەمئەندامانی ئێران؛ تاوەکو ئێستا کوژرانی 1332 کەس پشتڕاستکراوەتەوە و شەش هەزار و 186 کەسی دیکەش بریندار بوون.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ