یەکێک لە تۆمەتبارەکان ئەو ڤیدیۆیەی بە مۆبایلی کچەکە تۆمار کردووە
رووداو دیجیتاڵ
گوتەبێژی پۆلیسی سلێمانی دەڵێت، دوو کەسیان بە تۆمەتی سووكایەتی پێكردن و هێرشكردنە سەر کچێک دەستگیرکردووە.
رۆژی دووشەممە 08-05-2023 سەرکەوت ئەحمەد، گوتەبێژی پۆلیسی سلێمانی بە تۆڕی میدیایی رووداوی گوت "ئەو کچە هەردوو کوڕەکە دەناسێت و هاوڕێی یەکدی بوون. یەکێک لە کوڕەکان بانگی کچەکەی کردووە بۆ گۆیژە و وا دیارە ویستویەتی دەستدرێژی بکاتە سەر، بەڵام کچەکە رەتیکردووەتەوە. کوڕەکە دواتر سووکایەتی بە کچەکە کردووە و هەڕەشەی لێکردووە؛ تۆمەتباری دووەمیش مۆبایلی لە کچەکە وەرگرتووە و ڤیدیۆی تۆمار کردووە".
بەگوتەی گوتەبێژی پۆلیسی سلێمانی، کچەکە بە تۆمەتی دزینی مۆبایلەکەی سکاڵای یاسایی لەسەر هەردوو کوڕەکە تۆمارکردووە و دوای بەدواداچوون هەردوو تۆمەتبار دەستگیرکراون.
سەرکەوت ئەحمەد دەڵێت: "لە ئەنجامی لێکۆڵینەوەکاندا دەركەوتووە؛ تۆمەتبارەکان چەند جارێک سووكایەتییان بە کچەکە کردووە، هێرشیان کردووەتە سەری و تەقەیان بەسەردا کردووە".
یەکێک لە تۆمەتباران بەناوی (ش. س. ع.) لەدایكبووی 1999ـیە و ئەوی دیکەیان ناوی (ر. ح. ق.)ـە و لەدایكبووی ساڵی 1997ـە. بە گوتەی سەرکەوت ئەحمەد، بەبڕیاری دادوەر راگیراون و لێكۆڵینەوە لەگەڵیاندا بەردەوامە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ