نرخی گەشتی عومرە زیاتر لە 200 دۆلار دادەبەزێت

 

رۆژی هەینی 9-9-2022، کاروان ستوونی، گوتەبێژی بەڕێوەبەرایەتیی حەج و عومرەی هەرێمی کوردستان بە تۆڕی میدیایی رووداوی گوت: "دوای ئەوەی دەرگەمان کردەوە بۆ دانانی کۆمپانیای حەج و عومرە و مەرجەکانمان کەمکردەوە، خەڵکانێکی زۆر هاتن و گرێبەستیان کرد، ئەمەش کێبڕکێی دروستکرد و بووە هۆی دابەزینی نرخی گەشتی عومرە".

 

لە رابردوودا هەرکەسێک بیویستایە کۆمپانیای حەج و عومرە دابنێت، پێویست بوو حەجی کردبێت، بەڵام ئەو مەرجە لابراوە؛ کاروان ستوونی دەڵێت، ئێستا هەرکەسێک چەند عومرەیەکی کردبێت و زمانی عەرەبی بزانێت و بتوانێت گەشت بەڕێوەببات، ئەوە دەتوانێت کۆمپانیای حەج و عومرە دابنێت.

 

ئێستا لە هەرێمی کوردستان 150 کۆمپانیای حەج و عومرە مۆڵەتی فەرمییان وەرگرتووە و کاردەکەن، کاروان ستوونی گوتی، نرخی حەج و عومرە لە مانگەکانی رابردوودا لە 900 دۆلارەوە تاوەکو هەزار دۆلاربوو؛ ئێستا کۆمپانیا هەیە کێبڕکێ دەکات و عومرەکار بە 720 دۆلار دەگوازێتەوە مەککە و مەدینە و ئەوەش بووە بە هۆکاری ئەوەی خواستێکی زۆر لەسەر عومرەکردن دروستببێت.

 

هەر کۆمپانیایەک هاونیشتمانییان بۆ عومرە بباتە وڵاتی سعودیە، دەبێت بەرنامەی کارەکەی و لیستی ناو و ژمارەی تەلەفۆنی عومرەکاران بباتە بەڕێوەبەرایەتیی حەج و عومرە؛ گوتەبێژی بەڕێوەبەرایەتیی حەج و عومرەی هەرێمی کوردستان دەڵێت: "بەوردی چاودێریی گەشتی کۆمپانیاکان دەکەین، رێگەنادەین لەژێر هیچ بیانوویەکدا پارەی زیاتر لەوە وەربگرن لەسەری رێککەوتوون؛ رێگەنادەین بە ئارەزووی خۆیان بیانبەنە هەر هۆتێلێک خۆیان بیانەوێت؛ لە کوردستان و لە سعودیەش لەژێر چاودێریماندان بۆئەوەی باشترین خزمەت پێشکێشی هاونیشتمانییان بکەن".

 

لەجیاتی ئەو بڕە پارەیەی لە هاونیشتمانی وەردەگیرێت بۆ عومرەکردن، کۆمپانیا لەسەریەتی، ڤیزە و تیکتی چوون و هاتنەوەی فڕۆکە، شوێنی مانەوە لە هۆتێل، هاتووچۆی نێوان مەککە و مەدینە و شوێنە پیرۆزەکانی دیکە بۆ عومرەکار بۆ ماوەی 10 رۆژ دابین بکات.