پارێزگای کەرکووک هۆشداری دەداتە دانیشتووانی نزیک زێی بچووک

 

 

لە ئاگادارییەکدا کە لەلایەن نووسینگەی راگەیاندنی پارێزگاری کەرکووکەوە بڵاوکراوەتەوە، هاتووە: "بەهۆی هاتنی لێشاوێکی زۆری ئاو لەو دۆڵ و شیوانەی دەڕژێنە نێو زێی بچووکەوە، هەروەها لە ئەنجامی بەردانەوەی بڕێکی زۆری ئاو لە بەنداوی دوبزەوە بە ئاراستەی رێڕەوی زێی بچووک، داوا لە سەرجەم هاووڵاتیان و دانیشتووانی گوندەکانی هەردوو دیوی زێی بچوک دەکەین بەپەلە و دەستبەجێ لە ڕێڕەوی رووبار و دۆڵەکان دوور بکەونەوە و نزیکی کەنارەکانی رووبار نەبنەوە، هەروەها هەوڵی پەڕینەوە نەدەن لەو رێگایانەی کە ئاویان بەسەردا دەڕوات".

 

ئەم هۆشدارییە بەپێی راگەیێندراوەکە، "لەپێناو پاراستنی سەلامەتیی گیانیان و ماڵ و سامانیانە."

 

راگەیێندراوەکە لە کاتێکدایە، شەپۆلێکی بارانبارینی بەخوڕ بەشێکی زۆری باشووری کوردستانی گرتوەتەوە و لە ئەنجامی دروستبوونی لافاو و کاریگەرییەکانی بارانبارینەوە سێ کەس گیانیان لەدەستداوە کە یەکێکیان لە سنووری کەرکووک بوو.