هەڵەیەک روویدا! دووبارە هەوڵبدە
رووداو دیجیتاڵ
لە پارێزگاکانی وان، بەدلیس، مووش و جۆلەمێرگی باکووری کوردستان، بەهۆی بەفر بارینەوە رێگەی هەزار و 11 گوند داخران.
ئەمڕۆ شەممە، شەپۆلێکی بەفر و باران زۆرینەی شارەکانی باکووری کوردستانی گرتەوە. بەفری زۆر باریوە و هاونیشتمانییان رووبەڕووی سەختیی زۆر بوونەتەوە.
گەورەشارەوانیی وان رایگەیاند، لە سنووری پارێزگاکە رێگەی 405 گوند داخراوە. تیمەکانی شارەوانی بۆ راماڵینی بەفر و کردنەوەی رێگەکان لە هەوڵی بەردەوامن.
لە ناوەندی شاری وان و شارۆچکەکانی دەوروبەریدا شەختەیەکی زۆر لەسەر شەقامەکان دروستبووە و هۆشداری لەمبارەیەوە دراوە.
جۆلەمێرگ
لە پارێزگای جۆلەمێرگ بەهۆی داخرانی رێگەکانەوە هاونیشتمانیان لە هاتووچۆدا رووبەڕووی گرفت بوونەتەوە.
ئیدارەی تایبەتیی جۆلەمێرگ رایگەیاند، لە ناوەند و شارۆچکەکاندا بەهۆی بەفرەوە رێگەی 353 گوند داخراوە و تیمەکانی راماڵینی بەفر لە هەوڵی کردنەوەی رێگەکانن.
لەسەر رێگەی جۆلەمێرگ - وان و رێگەی جۆلەمێرگ - چەلێ بەفر هەرەسی هێناوە و کارکردن بۆ کردنەوەی رێگەکان بەردەوامە.
مووش
شێخموس یەنتور، سکرتێری گشتیی ئیدارەی تایبەتی مووش رایگەیاند، لە پارێزگاکەدا بەفربارین بەردەوامە و رێگەی 142 گوند داخراون. یەنتور دەڵێت، بۆ ئەوەی هاونیشتمانیان تووشی گرفت نەبن، تیمەکانیان لە کارەکانیان بەردەوامن.
بەدلیس
لە پارێزگای بەدلیس بەفرێکی زۆر باریوە و رێگەی 111 گوند داخراون.
ئومیت کورتکان، بەڕێوەبەری خزمەتگوزارییەکانی رێگەوبان و گواستنەوە لە ئیدارەی تایبەتی بەدلیس رایگەیاند، لە سنووری پارێزگاکە بەهۆی بەفرەوە رێگەی 111 گوند داخراون و تیمەکان لە راماڵینی بەفر و کردنەوەی رێگەکان بەردەوامن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ