ئایدن مەعرووف: دابەشکردنی کورسیی پێکهاتەکان بەسەر پارێزگاکاندا رەتدەکەینەوە

 

ئایدن مەعرووف، ئەندامی مەکتەبی سیاسیی بەرەی تورکمانی لە بەرنامەی رووداوی ئەمڕۆ، کە نوێنەر فاتیح پێشکێشی دەکات گوتی، ئەوان وەک پێکهاتەکان دابەشکردنی کورسییەکانیان بەسەر پارێزگاکاندا رەتدەکەنەوە و پێداگیریی دەکەن بە یەک بازنە بەشداری هەڵبژاردن بکەن.

 

بەپێی زانیارییەکانی رووداو، نێردەی تایبەتی نەتەوە یەکگرتووەکان لە عێراق (یۆنامی) دوو پێشنیازی بۆ پارتی دیموکراتی کوردستان و یەکێتیی نیشتمانیی کوردستان کردووە لەبارەی کورسیی کۆتای پێکهاتەکان، کە ماوەیەکە بووەتە کرۆکی ناکۆکیی نێوان ئەو دوو لایەنە بۆ ئەنجامدانی پرۆسەی هەڵبژاردن و پێشنیازی یەکەمی یۆنامی ئەوەیە کە خواستی پێکهاتەکان جێبەجێ بکرێت و بە یەک بازنە بەشداریی هەڵبژاردن بکەن، بەڵام ئەگەر ئەو دوو حیزبە لەسەر ئەو دوو پێشنیازە رێکنەکەوتن ئەوا 2 کورسیی کۆتاکان بۆ پارێزگای سلێمانی تەرخان بکرێت کورسییەک بۆ تورکمان و کورسییەکیش بۆ کریستیانەکانی ئەو پارێزگایە.

 

ئایدن مەعرووف، کە وەزیری هەرێم بۆ کاروباری پێکهاتەکانیشە گوتی "رۆژی پێنجشەممە 13/4/2023 لەگەڵ نوێنەری نەتەوە یەکگرتووەکان کۆدەبینەوە لەبارەی کورسیی کۆتاکان و ئێمە بەشێک نین لە ململانێ و کێشەکانی پارتی و یەکێتی، بەڵام پێداگیری لە سیستمی یەک بازنەیی هەڵبژاردن دەکەین و رێگەنادەین کورسیی کۆتاکان بەسەر ناوچەکاندا دابەشبکرێت."

 

بە گوتەی مەعرووف؛ بەپێی هەڵسەنگاندنەکانی ئەوان لە سەنتەری پارێزگای هەولێر 300 بۆ 400 هەزار تورکمان و لە قەزای کفریش 5 بۆ 10 هەزار تورکمان هەن، بۆیە داوای زیادکردنی پشکی تورکمان لە کورسیی کۆتاکان دەکەن لە 5 کورسییەوە بۆ 7 کورسی.

 

جگە لە کورسیی کۆتاکان، ئێستا پشکی تورکمان لە ئەنجوومەنی کۆمیسیارانی کۆمسیۆنی باڵای سەربەخۆی هەڵبژاردن و راپرسی هەرێمی کوردستان یەکێکی دیکەیە لە گرفتەکان و لایەنە تورکمانییەکان نەیانتوانی لەسەر بەربژێرێکی هاوبەش لەو ئەنجوومەنە رێکبکەون کە لە بنەمادا کورسییەکە لەسەر پشکی پارتی دیموکراتی کوردستانە و بۆ پێکهاتەی تورکمان تەرخانکراوە.

 

لەوبارەیەوە ئایدن مەعرووف گوتی: "سیستمی دابەشکردنی ئەنجوومەنی کۆمیسیاران هەڵەیە و دژی ئەوەین تورکمان لەسەر پشکی پارتی بێت و داوادەکەین تورکمان پشکی خۆی هەبێت لە ئەنجوومەنی کۆمیسیاراندا."

 

ناکۆکییەکان لە کاتێکدان، رۆژی 26-03-2023، دڵشاد شەهاب، گوتەبێژی سەرۆکایەتیی هەرێمی کوردستان لە کۆنفرانسێکی رۆژنامەڤانیدا رایگەیاند، سەرۆکی هەرێمی کوردستان بەپێی یاسای ژمارە یەکی ساڵی 2005ـی هەموارکراو کە یاسای سەرۆکایەتیی هەرێمی کوردستانە، رۆژی 18-11-2023ـی وەکو رۆژی بەڕێوەچوونی هەڵبژاردنی پەرلەمان دیاریکردووە.