رووداو دیجیتاڵ
سەرۆکوەزیرانی هەرێمی کوردستان لەگەڵ شاندێکی هاوپەیمانان لە عێراق و سووریا کۆبووەوە و باسیان لە پرۆسەی چاکسازی وەزارەتی پێشمەرگە و نەهێشتنی دەستوەردانی حیزبی لە وەزارەتەکەدا کرد.
رۆژی یەکشەممە 13-08-2023، مەسرور بارزانی، سەرۆکوەزیرانی هەرێمی کوردستان پێشوازی لە شاندێکی باڵای فەرماندەیی گشتيى هێزەکانی هاوپەیمانان لە عێراق و سووریا کرد کە لە جەنەرال ماتیۆ ماکفەرلین و جەنەرال جۆول ڤاول، فەرماندەی گشتیی پێشوو و نوێی هاوپەیمانان پێکهاتبوون.
حکومەتی هەرێمی کوردستان دەڵێت، لە کۆبوونەوەکەدا مەسرور بارزانی سوپاسی جەنەرال ماکفەرلین-ی کرد بۆ هەوڵ و خزمەتەکانی لە ماوەی کارکردنیدا و هیوای سەرکەوتنیشی لە ئەرکی داهاتوویدا بۆ خواست.
سەرۆکوەزیران پیرۆزبایی دەستبەکاربوونی لە جەنەرال ڤاول کرد، لە راگەیێندراوەکەدا هاتووە، هەموو هاریکاری و پشتیوانییەکی حکومەتی هەريمی کوردستانی لەپێناو سەرخستنی ئەرکەکەی بۆ دەربڕی.
لە کۆبوونەوەکەدا مەسرور بارزانی و شاندەکەی هاوپەیمانان پرۆسەی چاکسازی وەزارەتی پێشمەرگە و نەهێشتنی کێشە و بەربەستەکانیان لەبەردەم یەکخستنی هێزەکانی پێشمەرگە و نەهێشتنی هەموو جۆرە دەستوەردانێکی حیزبی لە وەزارەتی پێشمەرگەدا تاوتوێ کرد.
حکومەتی هەرێمی کوردستان دەڵێت، بارودۆخی گشتیی عێراق و پەرەسەندنەکانی رووبەڕووبوونەوەی هەڕەشەکانی داعش لە عێراق و سووریا، بەشێکی دیکەی گفتوگۆکانی کۆبوونەوەکە بوو.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ