لێدوانی ئەحمەد کانی بۆ رووداو
رووداو دیجیتاڵ
ئەحمەد کانی، بەرپرسی لقی دووی پارتی دیموکراتی کوردستان بەربژێری حیزبەکەیەتی بۆئەوەی ببێتە وەزیری ئەوقاف و کاروباری ئایینی و دەڵێت: "وەزارەتی ئەوقاف بەتەنیا وەزارەتی ئایینێک نییە و پەیوەستە بە هەموو ئایینەکانی نێو هەرێمی کوردستان."
رۆژی سێشەممە 13-12-2022، ئەحمەد کانی، بەربژێری پارتی دیموکراتی کوردستان بۆ وەزیری ئەوقاف و کاروباری ئایینی بە بەهرۆز فەرەیدوون، پەیامنێری رووداوی راگەیاند: "چاوەڕێی حکومەتی هەرێمی کوردستان دەکەم فەرمانی دەستبەکاربوونم لە وەزارەتی ئەوقاف دەربکات. تا ئێستاش بە فەرمی هیچ وادەیەکیان بۆ ئەمە دیاری نەکردووە."
دوای کۆتاییهاتنی کۆنگرەی 14ی پارتی دیموکراتی کوردستان و لە یەکەمین کۆبوونەوەی کۆمیتەی ناوەندی ئەو حیزبەدا بڕیاردرا هەر ئەندامێکی مەکتەبی سیاسیی ئەو حیزبە پۆستی حکومی و پەرلەمانی هەیە، دەبێ دەستبەرداری پۆستەکەی بێت.
پشتیوان سادق، وەزیری ئەوقاف و کاروباری ئایینی هەرێمی کوردستان یەکێک لەو کەسانە بوو کە وەکو ئەندامی مەکتەبی سیاسیی پارتی هەڵبژێردرا و ئێستا پارتی دیموکراتی کوردستان ئەحمەد کانی بۆ جێگرەوەی دەستنیشان کردووە.
ئەحمەد کانی لەبارەی پلانەکانی بۆ دەستبەکاربوون وەک وەزیری ئەوقاف و کاروباری ئایینی دەڵێ: "پلان و رێنماییەکانی وەزارەتەکان دیارن. منیش لە چوارچێوەی ئەو رێنماییانەدا کاردەکەم و هەوڵ دەدەم خزمەتی زیاتری ئەم وەزارەتە بکەم."
ئەحمەد کانی دەڵێت: "وەزارەتی ئەوقاف و کاروباری ئایینی بۆ هەموو ئایینەکانە. شانازی بە موسڵمانبوونی خۆمەوە دەکەم، بەڵام لە ئیسلامدا دەمارگیری نییە. ئیسلام ئایینێکە رێز لە هەموو ئایینەکانی دیکە دەگرێت."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ