هەڵەیەک روویدا! دووبارە هەوڵبدە
رووداو دیجیتاڵ
شەش پارتى دیکەى کریستیان بڕیاریاندا بایکۆتى هەڵبژاردنى داهاتووى پەرلەمانى کوردستان بکەن وەک ناڕەزایەتییەک بەرامبەر بە بڕیارى دادگەى فیدڕاڵى بۆ هەڵوەشاندنەوەى کورسییەکانی کۆتا لە پەرلەمان و دەڵێن: "هەر کەسێک لە رێگەى لیستە گشتییەکانەوە بگاتە پەرلەمان نوێنەرایەتى ئەوان ناکات".
14ى ئادارى 2024، شەش پارتى کریستیان لە راگەیێندراوێکدا بایکۆتکردنى هەڵبژاردنى داهاتووى پەرلەمانى کوردستانیان راگەیاند و ئاماژەیان بەوەداوە کە ئەو هەڵوێستەیان وەک رەتکردنەوەى ئەو دیفاکتۆیەیە کە سەپێندراوە بەسەر کریستیانەکان لە رێگەى بڕیارى دادگەى فیدراڵى و هەموارنەکردنى یاسای هەڵبژاردن و تایبەتنەکردنى دەنگدان لە نێو پێکهاتەکەدا.
بڕیارە هەڵبژاردنى پەرلەمانى کوردستان لە 10ى حوزەیرانى داهاتوو بکرێت، یەکەمجارە بەبێ کورسیی کۆتایى پێکھاتەکان دەبێت، کە پێنج کورسیان بۆ کریستیانەکان، پێج بۆ تورکمانەکان و کورسیەکى دیکەیان بۆ ئەرمەنە، لە دواى ئەوەى لە 21ى شوبات دادگەى باڵاى فدراڵى عێراق ئەو کورسییانەى هەڵوەشاندەوە.
ئەو پارتە کریستیانانە لە راگەیێندراوەکەدا دەڵێن: "هەر کەسێک لە رێگەى لیستە گشتییەکانەوە بگاتە پەرلەمان، نوێنەرایەتى ئێمە ناکات و پابەند نابین بە هەڵوێست و سیاسەتەکانى و بەشێک دەبێت لەو ئەجێندا سیاسییەى بۆى هاتووەتە پەرلەمان".
شەش پارتە کریستیانەکە بریتین لە: بزوتنەوەى دیموکراتی ئاشوورى، پارتى یەکێتیی بەیت نەهرەینى نیشتمانى، پارتى دیموکراتی ئاشوورى، ئەنجوومەنى گەلى کلدان سریان ئاشوورى، پارتى رۆڵەکانى نەهرەین و پارتى بەیت نەهرەینى دیموکراتی.
11ى ئادارى 2024 ، نۆ پارتى دیکەى کریستان بەهۆى هەڵوەشاندنەوەى کورسیی کۆتاى پێکهاتەکانەوە بایکۆتى هەڵبژاردنى داهاتووى پەرلەمانى کوردستانیان راگەیاند.
رۆژێک دواتر و لە 12ى ئاداردا 10 حیزب و لایەنی تورکمانیی هەرێمی کوردستان بەهۆی بڕیاری دادگەی فیدراڵی سەبارەت بە نەهێشتنی کورسی کۆتا، بایکۆتی هەڵبژاردنیان راگەیاند و جەختیان کردەوە کە "تاوەکو ئەوکاتەی ستەمی کۆتای پێکهاتەکان هەڵدەگیرێت، بایکۆتی هەڵبژاردن دەکەن".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ