رووداو دیجیتاڵ
پارێزگاری هەولێر دەڵێ، بنکەیەکی تەندروستیی 24 کاژێری لەنێو سەنتەری خانەنشینان کراوەتەوە کە جگە لە خانەنشینانی سەنتەرەکە، کاسبکاران، خەڵک و گەشتیارانیش دەتوانن بۆ وەرگرتنی چارەسەر سەردانی بکەن.
ئەمڕۆ یەکشەممە 14-09-2025 ئومێد خۆشناو، پارێزگاری هەولێر لە کۆنفرانسێکی رۆژنامەڤانیدا کردنەوەی بنکەیەکی تەندروستیی 24 کاژێری لەنێو سەنتەری خانەنشینانی هەولێر راگەیاند.
ئومێد خۆشناو گوتی: ''پێشتر ئەو بنکە تەندروستییە هەبوو، بەڵام رۆژانە تەنیا چەند کاژێرێک کراوە بوو. بنکەکە لە ئەمڕۆوە دەکرێتە 24 کاژێری و بەردەوام ئێشکگری لێ دەبێت.''
بە گوتەی پارێزگاری هەولێر، خانەنشینانی نێو سەنتەرەکە، کاسبکارانی بازاڕ و ئەو کەسانەی کەلوپەل دەکڕن، دەتوانن بۆ وەرگرتنی چارەسەر سەردانی بنکە تەندروستییەکە بکەن.
سەنتەرەکەی خانەنشینان دەکەوێتە نزیک قەڵای هەولێر و لە ناوەندی شارەکەیە. ئومێد خۆشناو دەڵێت: ''پێشتر بنکەکە تایبەت بوو بە پیاوان، بەڵام ئێستا زیاتر لە 500 ژن و پیاوی خانەنشین ناویان لەو سەنتەرەدا تۆما کردووە و رۆژانە تێیدا کات بەسەر دەبەن.''
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ