رووداو دیجیتاڵ
ناوەندی ڕاگەیاندنی هێزەکانی سووریای دیموکرات (هەسەدە) رەتیدەکاتەوە رێگرییان لە هاووڵاتیانی سڤیل کردبێت بۆ جێهێشتنی شاری "دێر حافر" و رایدەگەیەنێت، هۆکاری پەککەوتنی جووڵە لە ناوچەکەدا بۆ تۆپباران و پەرەسەندنە سەربازییەکانی گرووپە چەکدارەکانی سەر بە دیمەشق دەگەڕێتەوە.
لە بەیاننامەیەکی فەرمیدا کە ئەمڕۆ 15ی کانوونی دووەمی 2026 بڵاوکرایەوە، هێزەکانی سووریای دیموکرات (هەسەدە) سەرلەبەری ئەو تۆمەتانەی وەزارەتی بەرگریی سووریا رەتکردەوە کە باس لە رێگریی هەسەدە دەکەن لە دەرچوونی خەڵکی دێر حافر. هەسەدە جەخت دەکاتەوە کە ئەوەی دەگوزەرێت "کۆکردنەوەی هێز و تۆپبارانی بەردەوامە" لەلایەن لایەنەکانی سەر بە دیمەشق، کە مەترسی بۆ سەر ژیانی خەڵک دروست کردووە و رێگەکانی پەکخستووە.
لە بەیاننامەکەدا هاتووە: "لە کاتێکدا دیمەشق ئێمە تۆمەتبار دەکات، بەڵام خۆی لە 6ی ئەم مانگەدا بڕیاری فەرمی داخستنی تەواوی دەروازەکانی لەگەڵ ناوچەکانی باکوور و رۆژهەڵاتی سووریا دەرکردووە."
هەسەدە هۆشداری دەدات کە هەر هەوڵێک بۆ کۆچپێکردنی زۆرەملێی 170 هەزار کەس لە دێر حافر لەژێر گوشاری چەک و لەم سەرمایەدا، بەپێی رێککەوتننامەی جنێڤ و پەیماننامەی رۆما بە "تاوانی جەنگ" هەژمار دەکرێت. داواش لە نەتەوە یەکگرتووەکان و رێکخراوە مرۆییەکان دەکات دەستبەجێ بێنە دەنگ بۆ رێگریکردن لە "کارەساتێکی مرۆیی."
دۆخی سیاسی و سەربازی
ئەم ئاڵۆزییانە لە کاتێکدایە کە سووریا لە سەرەتای ساڵی 2026دا بە قۆناخێکی هەستیاردا تێدەپەڕێت. دوای گۆڕانکارییە خێراکان لە دیمەشق و دروستبوونی "حکومەتی کاتی"، هێشتا ململانێ لەسەر ناوچەکان لە نێوان هێزەکانی سووریای دیموکرات و سوپای سووریا (گرووپە هاوپەیمانەکانی) بەردەوامە.
گرنگیی دێر حافر
شاری دێر حافر دەکەوێتە رۆژهەڵاتی پارێزگای حەلەب، ناوچەیەکی ستراتیژییە و وەک خاڵێکی بەیەکگەیشتن لە نێوان ناوچەکان دەبینرێت. گرژییەکانی ئەم دواییە و داخستنی مەرزەکان کاریگەرییەکی راستەوخۆی کردووەتە سەر بژێوی و هاتووچۆی دەیان هەزار هاووڵاتی کە لەو ناوچانەدا دەژین.
لە چەند رۆژی ڕابردوودا، پرسی دەروازەکان بووەتە کێشەیەکی سەرەکی؛ لە لایەکەوە دیمەشق دەروازەکانی داخستووە، لە لایەکی دیکەشەوە ئیدارەی خۆسەر لە باکووری سووریا بڕیاری داخستنی دەروازەی کانتۆنەکانی وەک دێرەزوور و رەققەی داوە وەک کاردانەوەیەک بۆ دۆخە ئەمنییە نوێیەکە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ