شوێنی رووداوەکە
رووداو دیجیتاڵ
بەهۆی تەقینەوەی بووتڵی غاز لە چێشتخانەیەکی شاری دهۆک، حەوت کارمەندی چێشتخانەکە بریندار دەبن؛ وەزارەتی تەندروستی دەڵێت، تەندروستی بریندارەکان جێگیرە.
هونەر رەشید، پەیامنێری رووداو لە دهۆک رایگەیاند: ئێوارەی ئەمڕۆ سێشەممە 15-11-2022، بەهۆی تەقینەوەی بووتڵێکی غاز لە یەکێک لە چێشتخانەکانی شاری دهۆک، حەوت کارمەندی چێشتخانەکە بریندار بوون.
پەیامنێری رووداو لە شوێنی رووداوەکەدا ئاماژەی بەوەشدا کە لەنێو چێشتخانەکە فڕنێک هەبووە بۆ برژاندنی پیتزا و چەند خواردنێکی دیکە و ئاگر لەنێو فڕنەکەوە دروستبووە و تەقینەوە روویداوە.
خاوەنی چێشتخانەکە قسەی بۆ پەیامنێری رووداو کرد و گوتی: "رووداوەکە لە دوای کاژێر 07:00ی ئێوارە بوو؛ هۆکارەکەش بووتڵی غاز بوو، ئاگر لە فڕنەکەوە دەرچوو و گەیشتە بووتڵی غازەکە، بەو هۆیەوە بووتڵەکە تەقییەوە."
لەبارەی ژمارەی بریندارەکان و رەوشی تەندروستیان، خاوەنی چێشتخانەکە گوتی: "یەک دووانێکیان برینان سەختە، ئەوانی دیکە برینەکەیان سووکە."
هەروەها وەزارەتی تەندروستیی هەرێمی کوردستان لە راگەیێندراوێکدا ئاماژەی بەوەدا، بریندارەکان لە نەخۆشخانە چارەسەر وەردەگرن و "خۆشبەختانە باری تەندروستییان جێگیرە."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ