رووداو دیجیتاڵ
لە قەزای شەمرەخی سەر بە پارێزگای مێردین لە باکووری کوردستان، تەرمی دوو منداڵ دۆزرانەوە کە پێشتر ون ببوون.
لە گەڕەکی مەشەلی، دوو منداڵ بە ناوەکانی (د. ئـ.)ی تەمەن 9 ساڵ و (ئـ. ئـ)ی تەمەن 7 ساڵ لە کاژێر 16:30ی ئێوارەی رۆژی هەینی 16-01-2026ـەوە بێسەروشوێن ببوون، دوای ئەوەی کەسوکارەکەیان لایەنە پەیوەندیدارەکانیان ئاگادار کردەوە، تیمەکانی جەندرمە، ئافاد و فریاگوزاریی 112 دەستیان بە گەڕان کرد.
لەنێو گەڕەکەکەدا و لەنزیک گۆمێکی بچووک، شوێنپێی منداڵەکان دۆزرایەوە و بیندرا، کە بەشێک لە سەهۆڵی سەر رووی گۆمەکە شکاوە.
دوای گەڕانێکی تیمەکانی مەلەوانان و رزگارکردنی جەندرمە، تەرمی هەردوو منداڵەکەیان لەنێو گۆمەکەدا دۆزییەوە.
تەرمەکان بۆ توێکاری رەوانەی نەخۆشخانە کران و عومەر توغرول کونداکچی، قایمقامی شەمرەخ، گەیشتە شوێنی رووداوەکە و سەرپەرشتیی کارەکانی کرد.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ