گوتەبێژی پارتی: گۆڕانکارییەکانی نێو یەکێتیمان پێباشە

 

مەحموود محەممەد، گوتەبێژی پارتی دیموکراتی کوردستان لە میانەی بەشداریکردنی لە بەرنامەی رووداوی ئەمڕۆ کە بێستوون عوسمان کاژێر 22:00 پێشکێشی دەکات، باسی لە گۆڕانکارییەکانی نێو یەکێتی و داهاتووی پەیوەندییە دووقۆڵییەکانی پارتی لەگەڵ ئەو حیزبە کرد، گوتی، "هێشتا دیار نییە یەکێتی دوای گۆڕانکارییەکان چۆن مامەڵە لەگەڵ بارودۆخی هەرێمی کوردستاندا دەکات و پەیوەندی لەگەڵ ئێمە و لایەنەکانی دیکەدا چۆن دەبێت." گوتیشی، گۆڕانکارییەکانیان پێ باشە، "ئەگەر هەنگاونان بێت بەرەو لابردنی بەربەستەکانی بەردەم چاکسازی."

 

لە بەشێکی دیکەی گفتوگۆی بێستوون عوسمان و مەحموود محەممەد، تاوتوێی هەڵویستی پارتی دیموکراتی کوردستان بەرامبەر پەکەکە کرا. ئەو ئاماژەی بەوە کرد کە رێککەوتنی تورکیا و حکومەتی هەرێمی کوردستان و پەکەکە لە پرۆسەی ئاشتیدا، لەسەر بنەمای رێککەوتنێکی ساڵی 1992 کراوە، کە لەنێوان یەکێتی و پارتی و پەکەکەدا واژۆکراوە.

 

گوتەبێژی پارتی رایگەیاند، "بەپێی ئەو رێكکەوتنە گەریلاکان دەتوانن تەنیا لە بارەگا کۆنەکانی یەکێتی لە ناوچەی قەندیل بن، نەک داببەزنە مەخموور و شنگال و ناوچەکانی دیکە."

 

مەحموود محەممەد راشیگەیاند، "ئەگەر گەریلاکانی پەکەکە بگەڕێنەوە ناوچەی قەندیل و بەپێی رێککەوتنەکە مامەڵە بکەن، ئەوا کێشەمان لەگەڵیاندا نابێت، قسەیەکی دیکەمان لەگەڵ تورکیاشدا دەبێت و پێیان دەڵێین بەپێی رێککەوتن لەوێن."

 

سەبارەت بە چالاکی و مامەڵەکردنی پەکەکە لە سنووری خاکی هەرێمی کوردستان، مەحموود محەممەد ئەوەی خستەڕوو کە ئەوان میوانن لە هەرێمی کوردستان و خاوەنماڵ نین، "بەڵام ئەوان دان بە دامودەزگاکانی حکومەتی هەرێمی کوردستاندا نانێن و خۆیان بە خاوەنماڵ دادەنێن، لەبەرئەوە پێویستە پەکەکە هەڵوێستی خۆی بەرامبەر هەرێمی کوردستان بگۆڕێت."