هەڵەیەک روویدا! دووبارە هەوڵبدە
کۆڵانێکی گەڕەکی قڕگە لە سلێمانی
رووداو- سلێمانی
دانیشتووانی کۆڵانێک لە گەڕەکێکی هەژارنشینی سلێمانی، گلەیی لە نەبوونی خزمەتگوزارییە سەرەتاییەکان دەکەن و دەڵێن، بەهۆی تەواونەکردنی پڕۆژەی ئاوەڕۆوە، بۆنی زێراب و مەترسیی مار و دووپشک بێزاریانی کردووە. کۆمپانیای جێبەجێکار بەڵێنی چارەسەر دەدات، بەڵام شارەوانی دەڵێت، بودجەی پێویستیان نییە.
بەشێک لە دانیشتووانی گەڕەکی قڕگە گلەیی لەوە دەکەن کۆمپانیای جێبەجێکاری پڕۆژەی خزمەتگوزاریی ناوچەکە، کۆڵانەکەی ئەوانی بەجێهێشتووە، سەرەڕای ئەوەی خۆیان لەسەر گیرفانی خۆیان بەشێکیان کۆنکرێت کردووە.
شاخەوان تاهیر، یەکێک لە دانیشتووانی کۆڵانەکە بە رووداوی گوت: "هیچ خزمەتگوزارییەکمان نییە، بە 70 و 80 مەتر کێبڵ، کارەبامان راکێشاوە. هەموو کۆڵانەکان ئاوەڕۆی بۆ کراوە، هی ئێمە نەبێت."
نەبوونی ئاوەڕۆ و خراپیی رێگەکە، ژیانی رۆژانەی لە دانیشتووانەکەی تاڵ کردووە، بەتایبەتی لە وەرزی زستاندا. نوخشە محەممەد، کابانێکی ماڵە و دەڵێت: "لە زستاندا حاڵمان زۆر خراپە، بەیانیان منداڵەکانم دەبەم و لەگەڵ پاسەکەدا دەڕۆم هەتا دەگەنە قوتابخانە."
تۆڕی میدیایی رووداو کێشەی دانیشتووانی کۆڵانەکەی گەیاندە کۆمپانیای جێبەجێکار. بەکر هەمزە، ئەندازیاری پڕۆژەکە رایگەیاند: "پێشتر بەهۆی لێژیی شوێنەکە و نەتوانینی ئامێرەکانمانەوە نەمانتوانی کارەکانیان بۆ بکەین، بەڵام دوای تەواوبوونی ئەم پڕۆژەیەی لەبەردەستماندایە، ئامێرەکان دەگوازینەوە بۆ لای ئەوان و کارەکانیان بۆ تەواو دەکەین."
سەبارەت بە داواکارییەکانی دیکەی وەک قیرتاوکردن، شارەوانی بە رووداوی راگەیاند، لە ئێستادا بودجەی پێویستیان لەبەردەستدا نییە بۆ جێبەجێکردنی ئەو داواکارییانە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ