هەڵەیەک روویدا! دووبارە هەوڵبدە
رووداو دیجیتاڵ
بەڕێوەبەری گشتیی ئاو و ئاوەڕۆی هەرێمی کوردستان دەڵێت، بەم نزیکانە کارەکانی پڕۆژەی ریسایکلینی ئاوی هەولێر دەستپێدەکات.
رۆژی یەکشەممە، 20ـی تەممووزی 2025، ئاری ئەحمەد بە تۆڕی میدیایی رووداوی راگەیاند: "بەم نزیکانە کارەکانی پڕۆژەی ریسایکلینی ئاوی بەکارهاتووی هەولێر دەستپێدەکات و ئێستا لە پرۆسەی تەندەرینە، دوای ئەوە راستەخۆ دەست بە کار دەکرێت".
لەم پڕۆژەیە ئاوی بەکارهاتووی هەولێر ریسایکلین دەکرێت و بۆ ئاودانی سەوزایی و کشتوکاڵ بەکاردەهێنرێتەوە.
بە گوتەی ئاری ئەحمەد، پڕۆژەکە بۆ ئێستا تەنیا لە پارێزگای هەولێر دەبێت و بە لایەنی کەم دوو ساڵی دەوێت تاوەکو کارەکانی تەواو بن.
پڕۆژەی ریسایکلینی ئاوی بەکارهاتووی هەولێر دەکەوێتە گوندی عەرەب کەند لەسەر رێگەی هەولێر-گوێڕ. بەڕێوەبەری گشتیی ئاو و ئاوەڕۆی هەرێمی کوردستان دەڵێت: "بە گوژمەی 200 ملیۆن دۆلار جێبەجێ دەکرێت".
لەبارەی سوودەکانی پڕۆژەکە، ئاری ئەحمەد گوتی: "سوودی بۆ ئاوی ژێر زەوی، ئاودانی سەوزای و بیری جووتیاران دەبێت".
ئەمڕۆ مەسرور بارزانی، سەرۆکوەزیرانی هەرێمی کوردستان لە رێوڕەسمی کردنەوەی هێڵی یەکەمی پڕۆژەی ئاوی فریاگوزاریی هەولێر گوتارێکی پێشکێش کرد و رایگەیاند، حکومەت پلانی هەیە لە داهاتوودا پڕۆژەیەکی ریسایکلین بۆ ئاو جێبەجێ بکات "بە مەبەستی بەکارهێنانەوەی ئاو لە باخچەکان، ئاودێریی سەوزاییەکان کە بە زووترین کات دەخرێتە واری جێبەجێکردنەوە."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ