کوردستان موکریانی بۆ یەکەمجار باسی خۆشەویستی خۆی و عەبدوڵڵا پەشێو دەکات

رووداو-هەولێر

د. کوردستان موکریانی سەرۆکی پێشووی کۆڕی زانیاری کورد و کچی شاعیر و ئەدەبدۆست گیوی موکریانییە، لە بەرنامەی پەنجەمۆری رووداودا، رۆڵی ماڵباتەكەی لە بواری چاپەمەنی كوردی و هەندێك بیرەوەری و رووداوی تایبەتی ژیانی خۆی باس دەكات.

هەروەها بۆ یەکەمجار لە رێگەی رووداوەوە باس لە خۆشەویستییەکەی نێوان خۆی و شاعیر و زمانزانی نێوداری كورد عەبدوڵڵا پەشێو و ئەو شیعرانە دەكات كە بۆی نووسیون. ئەمشەو هەینی 20-9-2019  هەڤپەیڤینەکەی د. کوردستان موکریانی کاژێر 10:05 خولەک لە تۆڕی میدیایی رووداو پەخشدەکرێت. 

د.كوردستان موكریانی، ژنێك تەمەنێكی زۆری بۆ زمان و ئەدەبی كوردی تەرخانكردووە، ئەو كچی كەسایەتییەكی دیاری كوردستانە، گیوی باوكی و حوسێن حوزنی موكریانی مامی جێدەستیان لە پێشڤەبردنی ئەدەب و رۆشنبیری و رۆژنامەڤانی كوردی دا هەبووە.

 یەكەمجارە لەڕێگەی رووداوەوە كوردستان موكریانی باسی چیرۆكی عەشقی عەبدوڵڵا پەشێو و ئەو شیعرانە دەكات كە بۆی نووسیون. هەروەك كوردستان موكریانی دەڵێ ، عەبدوڵڵا پەشێو هەندێكجار شیعرەكانی خۆی بۆ ناردوون بۆ چاوپێداخشاندنەوە بەرلەوەی بڵاویان بكاتەوە، هەروەها دەڵێ هەندێك لە شیعرەكانی بۆ ئەو نووسیون، یەكێك لەو شیعرانە (بەڵێن بدە)یە كە تێیدا شاعیری گەورەی كورد عەبدوڵڵا پەشێو دەڵێت:
  
بەڵێن بدە ..
 هەناسەم بیت . سێبەرم بیت . بارانم بیت
 تاكو منیش شانۆی كۆنم جێ بهێڵم
 دەمامكی رووم فڕێ بدەم ..
 دوو باڵی پڕ خۆشەویستیم
 لە گەردنت گرێ بدەم

هەروەها  کوردستان موکریانی لەبارەی خۆشەویستی باسنەکراوی خۆی و شاعیری نێوداری کورد دەڵێت:" پەشێو كاتێك لە ژیانی مندا پەیدابوو، كەلكەلەی تەواوكردنی خوێندن لە دەرەوەی وڵات هەموو مێشكی داگیر كردبووم. ئەوسا هیچ پڕۆژەیەكی خۆشەویستی لە ژیانمدا نەبوو، بەداخەوە پەشێو ئەو بوێریەی تێدانەبوو پێم بڵێ خۆشیدەوێم".

 كوردستان موكریانی لەبارەی كاریگەری ئەو بەسەر شیعری پەشێوەوە دەڵێت "شاعیرێكە جێگەی دیاری هەیە، دوای ئەوەی منی ناسی، ژن و نیشتمان لە شیعرەكانیدا بوونە هاو واتا و تائێستاش ئەمە لە شیعرەكانی رەنگدەداتەوە".

پەشێو كە بەشاعێرێكی بە هەڵوێست لە پرسە نەتەوەییەكاندا و، نێودار و كاریگەر لەنێو وێژەی كوردی دا ناسراوە، دوای ئەوە ئەویش بۆ خوێندن دەچێتە مۆسكۆ و ئێستاش لە وڵاتی فینلاند دەژیت، تاوەکو ئێستا هیچ جارێك بە ئاشكرا باسی ئەو خۆشەویستییەی نەكردووە.

هەروەها كوردستان موكریانی باسی یادەوەری ناونانی خۆی لەلایەن باوكیەوە دەكات، كە لە خۆشەویستی بۆ كۆماری كوردستان، گیوی موكریانی باوكی ناوی ناوە (كوردستان)، ئەو ناوەی هەندێكجار كێشەی بۆ دروستكردووە، بەرپرسانی بەعس لەعێراق پێیان گوتووە ناوت كوردستانە و جوداخوازیت، زۆر بە زەحمەت وڵاتینامەی عێراقیان پێداوە.

گیوی باوكی كوردستان موكریانی و حوزنی مامی ساڵی 1923 دەچنە بەغدا و ساڵی 1925 دەچنە رواندز و ساڵی 1926 چاپخانەیەك لەوێ دادەمەزرێنن و گۆڤاری (زاری كرمانجی) دەردەكەن.

لەپاڵ چاپخانەی كوردستان بۆ چاپكردنی كتێب، گیوی موكریانی كامێرا دەهێنێتە هەولێر، وێنەی رۆشنبیر و كەسایەتییەكانی پێدەگرێت. لە هەولێریش گۆڤاری (رووناكی)، رۆژنامەی (هەولێر) و گۆڤاری (هەتاو) لە چاپخانەكەی چاپكراون.

• به‌شی بكه‌ لە
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger