رووداو دیجیتاڵ
دەزگای روانگە رایگەیاند، پێشبڕکێی بیرکاری لە نێوان قوتابیانی پۆلی 10ی بەشی زانستی قوتابخانەکانی هەرێمی کوردستان رێکدەخەن و 464 قوتابی بەشداریی تێدا دەکەن. بەڕێوەبەری پەیوەندی و راگەیاندنی دەزگاکەش دەڵێت، ئامانجیانە ئاستی زانستیی خوێندکاران بەرزبکەنەوە.
رۆژی دووشەممە 21-2-2022، ئاری رەسوڵ، بەڕێوەبەری پەیوەندی و راگەیاندنی دەزگای روانگە بە تۆڕی میدیایی رووداوی گوت: "ئەمە چوارەمین ساڵی پێشبڕکێیەکەیە، سەرەتا ئامانجمان تەنیا ئەوە بوو خوێندکاران روو بکەنە بەشە زانستییەکان، بەڵام ئێستا ئامانجەکانمان فراوانتر بووە و دەمانەوێت فکر و هزری خوێندکارانیش بەهێز بکەین".
قۆناخی یەکەمی پێشبڕکێیەکە رۆژی سێشەممە 22-2-2022، دەستپێدەکات و 464 قوتابی لە 21 هۆڵی تاقیکردنەوە لە هەرێمی کوردستان بەشداری تاقیکردنەوەیەک دەکەن و 60 قوتابی بۆ قۆناخی دووەم هەڵدەبژێردرێن.
لە قۆناخی دووەمدا، 60 قوتابییەکە تاقیکردنەوەی قۆناخی دووەم دەکەن و شەش قوتابی بۆ قۆناخی کۆتایی هەڵدەبژێردرێن.
قۆناخی کۆتایی لە شاری هەولێر دەکرێت، بەشێوازی راستەوخۆ قوتابیان پێشبڕکێ دەکەن بۆ بەدەستهێنانی نازناوی "پاڵەوانی بیرکاری لەسەر ئاستی هەرێمی کوردستان"، دواتر براوەکانی یەکەم، دووەم و سێیەم دەستنیشان دەکرێن و خەڵات دەکرێن.
ئەو قوتابیانەی لە سەرەتاوە بەشداریی پێشبڕکێیەکە دەکەن، بەسەر شەش بەڕێوەبەرایەتەی گشتیی پەروەردەی سەر بە وەزارەتی پەروەردە دابەشکراون:
- بەڕێوەبەرایەتیی گشتیی پەروەردەی هەولێر / 142 قوتابی
- بەڕێوەبەرایەتیی گشتیی پەروەردەی سلێمانی / 119 قوتابی
- بەڕێوەبەرایەتیی گشتیی پەروەردەی دهۆك / 134 قوتابی
- بەڕێوەبەرایەتیی گشتیی پەروەردەی گەرمیان / 32 قوتابی
- بەڕێوەبەرایەتیی گشتیی پەروەردەی کەرکووك / 23 قوتابی
- بەڕێوەبەرایەتیی گشتیی پەروەردەی هەڵەبجە / 14 قوتابی
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ