رووداو دیجیتاڵ
دەزگای ئاسایشی هەرێم رایگەیاند، بەڕێوەبەرایەتیی گشتیی ئۆپەراسیۆنەکانی ئاسایش بەهەماهەنگی هەواڵگری و دژەتیرۆری کەرکووکی سەر بە وەزارەتی ناوخۆی عێراق و هێزەکانی کۆماندۆی کوردستان توانیان لە سنووری پارێزگای کەرکووک سێ تیرۆریستیان دەستگیرکردووە.
دەزگای ئاسایشی هەرێم لە راگەیێندراوێکدا دەڵێت، بەهەماهەنگی هێزەکانی کۆماندۆی کوردستان و هاوپەیمانان- هێزی تایبەتی ئەمریکا کێوماڵی ناوچەی شوانیان ئەنجام داوە.
بەگوێرەی راگەیێندراوەکە، دوای ئەوەی لە رۆژی 18-09-2025 "تیرۆریستێک"یان لە سنووری پارێزگای کەرکووک دەستگیر کردووە، "دوای ئەنجامدانی لێکۆڵینەوە و دانپێدانانی تیرۆریست" شوێنی "دوو تیرۆریست"ـی دیکەیان لە سنووری پارێزگای سلێمانی دەستنیشان کردووە و هەردووکیان دەستگیر کردوون.
دەزگای ئاسایشی هەرێم دەڵێت، ئەو "تیرۆریستانە" لە ماوەی رابردوو "چەکداری داعش بوون و لە ئێستاشدا کاری رێکخراوەییان بۆ داعش کردووە و لە تۆڕە کۆمەڵایەتییەکان بیری توندڕۆییان بڵاوکردووەتەوە."
بەگوێرەی راگەیێندراوەکە، لە21-09-2025 بەڕێوەبەرایەتیی گشتیی ئۆپەراسیۆنەکانی ئاسایش بەهەماهەنگی هێزەکانی کۆماندۆی کوردستان و هاوپەیمانان- هێزی تایبەتی ئەمریکا، لە سنووری ناوچەی شوان کێوماڵی بەرفراوانیان ئەنجامداوە و چەندین شوێن و حەشارگەی "تیرۆریست"ـانیان لە نێوبردووە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ