رووداو دیجیتاڵ
دوای بۆردوومانی ناوەندە ئەتۆمییەکانی ئێران، گوتەبێژی دەستەی ژینگە رایگەیاند، هیچ تیشکدانەوەیەک لە هەرێمی کوردستان تۆمار نەکراوە.
بەرەبەیانی ئەمڕۆ، ئەمریکا لە رێگەی فرۆکەی جەنگییەوە بنکە ئەتۆمییەکانی فۆردۆ، نەتەنز و ئیسفەهانی لە ئێران کردە ئامانج.
د. سەنعان عەبدوڵڵا، گوتەبێژی دەستەی ژینگەی هەرێمی کوردستان، ئەمڕۆ بە تۆڕی میدیایی رووداوی گوت: "تاوەکو ئێستا لە ئامێری پشکنین و تۆمارکردنی پیسبوونی ژینگە بە تیشکدانەوە ئەتۆمییەکان، هیچ تیشکدانەوەیەک تۆمار نەکراوە".
لە شارەکانی هەولێر، سلێمانی، دهۆک، رانیە و زاخۆ ئامێری پشکنینی پیسبوونی هەوا لە تیشکدانەوە ئەتۆمییەکان دانراون.
لەبارەی هێرشەکەیانەوە بۆ سەر ناوەندە ئەتۆمییەکانی ئێران، دۆناڵد ترەمپ، سەرۆکی ئەمریکا رایگەیاند: "زۆر سەرکەوتوو بووە".
دوای هێرشەکەی ئەمرۆ، دەزگای سەلامەتیی ئەتۆمیی ئێران رایگەیاند، نیگەران مەبن و لە دەوروبەری بنکە ئەتۆمییەکان بەشێوەیەکی ئاسایی بژین و تیشکدانەوە تۆمار نەکراوە.
ئامێرەکانی پشکنینی تیشکدانەوەی ئەتۆم لە عێراق و هەرێمی کوردستان جێگیرکراون، لە یەک کاتدا و پێکەوە پشکنین بۆ هەوا دەکەن و لە هەبوونی تیشکی ئەتۆمیدا فەرمانگەکان ئاگادار دەکەنەوە.
زیانی تیشكدانەوەی ئەتۆم بەگوێرەی نزیکیی ناوچەکان کاریگەریی هەیە. کاریگەرییەکانی کوشندەن بۆ تەندروستیی مرۆڤ، ژینگە، خۆراک، خاک و ئاو.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ