هەڵەیەک روویدا! دووبارە هەوڵبدە
رووداو دیجیتاڵ
بەڕێوەبەرایەتیی گشتیی کەشناسی و بوومەلەرزەزانیی هەرێمی کوردستان، پێشبینییەکانی بۆ کەشوهەوای ئەمشەو بڵاوکردەوە و ئاماژەی بەوە دا کە شەپۆلێکی نمەبارانی پچڕ پچڕ بەردەوام دەبێت و لە ناوچە سنوورییەکانیش بەفر دەبارێت. کەشناسێکیش دەڵێت، "لە کەرکووک، دەشتی هەولێر، خورماتوو، هەڵەبجە و سلێمانی بارانێکی باش دەبارێت."
بەڕێوەبەرایەتیی گشتیی کەشناسی و بوومەلەرزەزانیی هەرێمی کوردستان رایگەیاند، "ئەمشەو تاوەکو بەیانیی سبەی چوارشەممە نمەبارانی پچڕ پچڕ بەردەوام دەبێت و هاوکات لەگەڵ بارانبارین، بەفرێکی کەم لە بەشێک لە ناوچەکانی ئیدارەی راپەڕین و ناوچە شاخاوییە سنوورییە بەرزەکانی رۆژهەڵات و باکووری رۆژهەڵاتی هەرێمی کوردستان دەبارێت. تێبینیی ئەوەش کراوە کە رێژەی بەفر لە ناوچە سنوورییە بەرزەکان زیاتر دەبێت."
پێشبینی دەکرێت لە نیوەڕۆی سبەی چوارشەممەوە کەشوهەوا ئاسایی ببێتەوە و کۆتایی بە شەپۆلەکە بێت.
هاوکات محەممەد کەمال، شارەزای کەشناسی، بە تۆڕی میدیایی رووداوی گوت، "ئەمشەو زۆرترین باران لە باشووری هەرێمی کوردستان دەبێت وەکو داقووق و خورماتوو و خانەقین، هەروەها لە دەشتی هەولێر، کەرکووک، هەڵەبجە، سلێمانی و ئیدارەی راپەڕین بارانێکی باش دەبارێت و لەنێوان 5 بۆ 12 ملیم دەبێت."
لەبارەی بەفربارین، ئەو کەشناسە گوتی، "تاوەکو بەرەبەیانی ئەمڕۆ ئەگەری بەفربارین لە ناوچە شاخاوییەکانی پیرەمەگروون، ماوەت، حاجی ئۆمەران، پێنجوێن و تەوێڵە و بیارە هەیە."
بە گوێرەی راگەیەندراوی کەشناسی، ئەمشەو بەتایبەت لە دوای نیوەشەوەوە تاوەکو بەیانیی سبەی بارانبارین لە چەند ناوچەیەک بەم شێوەیە دەبێت:
سەنتەری هەولێر: 1-2 ملیم
دەشتی هەولێر تا سنووری کۆیە: 3-5 ملیم
سلێمانی: 2-3 ملیم
هەڵەبجە: 3-5 ملیم
کەلار: 4-7 ملیم
کفری: 4-9 ملیم
کەرکووک: 2-4 ملیم
بەپێی ئامارەکانی کەشناسی، لە 12 کاتژمێری رابردوودا بڕی بارانبارین لە هەندێک لە ناوچەکان بەم شێوەیە بووە:
هەولێر: دڵۆپ دڵۆپ
پیرمام: 0.1 ملیم
چەمچەماڵ: 0.8 ملیم
هەڵشۆ: 1.4 ملیم
خەبات: 0.4 ملیم
بازیان: 1.2 ملیم
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ