رووداو دیجیتاڵ
سەرۆک بارزانی بۆ کۆچی دوایی دکتۆر دەشتی دزەیی، پەیامێکی سەرەخۆشی بڵاوکردەوە و رایگەیاند، "لەدەستدانی خەسارەتێكی گەورەیە".
ئەمڕۆ شەممە، 25-01-2025، دکتۆر دەشتی دزەیی، پزیشکی بەنێوبانگی هەرێمی کوردستان بۆ نەخۆشییەکانی دڵ و هەناو، بە نەخۆشی کۆچی دواییکرد.
سەرۆک بارزانی سەرەخۆشی لە خانەوادە، کەسوکار، دۆستان و هاوکارانی دکتۆر دەشتی دزەیی و تەواوی پزیشکانی کوردستان دەکات و دەڵێت، "خۆم بە هاوبەشی خەمتان دەزانم".
سەرۆک بارزانی لە پەیامی سەرخۆشییەکەدا دەڵێت: "دكتۆر دەشتی دزەیی بەشی زۆری تەمەنی خۆی بۆ خزمەتكردنی بواری ئاكادیمی و پزیشكیی كوردستان و یارمەتیدان و چارەسەركردنی نەخۆشەكان سەرف كردووە و لە هەمانكاتیشدا كەسایەتییەكی نیشتیمانپەروەر و پەرۆشی تەندروستیی هاووڵاتیان بوو و پێگەیەكی بەرزی لە ناوەندە زانستی، پزیشكی، جەماوەرییەكاندا هەبوو و لەدەستدانی خەسارەتێكی گەورەیە".
دەقی پەیامەکە:
بەداخێكی زۆرەوە هەواڵی كۆچی دوایی كەسایەتیی دیاری هەولێر و پزیشك و زانای كورد دكتۆر (دەشتی دزەیی)ـم پێ گەییشت. دكتۆر دەشتی دزەیی بەشی زۆری تەمەنی خۆی بۆ خزمەتكردنی بواری ئاكادیمی و پزیشكیی كوردستان و یارمەتیدان و چارەسەركردنی نەخۆشەكان سەرف كردووە و لە هەمانكاتیشدا كەسایەتییەكی نیشتیمانپەروەر و پەرۆشی تەندروستیی هاووڵاتیان بوو و پێگەیەكی بەرزی لە ناوەندە زانستی و پزیشكی و جەماوەرییەكاندا هەبوو و لەدەستدانی خەسارەتێكی گەورەیە.
پرسە و سەرخۆشیی خۆم ئاراستەی خانەوادە و كەسوكار و دۆستان و هاوكارانی خواڵێخۆشبوو دكتۆر دەشتی دزەیی و سەرجەم پزیشكانی كوردستان دەكەم و خۆم بە هاوبەشی خەمیان دەزانم.
لەخودای گەورە داواكارم گیانی خوالێخۆشبوو دكتۆر دەشتی دزەیی بە بەهەشتی بەرین شاد بكات و سەبر و ئارامی بە هەموو لایەك ببەخشێت.
انا للە و انا الیە راجعون
مسعود بارزانی
25ی كانوونی دووەمی 2025
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ