رووداو دیجیتاڵ
فەرماندەی پۆلیسی زاهیدانی سەر بە پارێزگای سیستان و بەلووچستانی ئێران دەڵیت، لەلایەن کەسانێکی نەناسراوەوە تەقە لە بنکەیەکی پۆلیسی شارەکە کرا، گوتیشی، تەقەکەرەکان هەڵاتوون.
رۆژی هەینی 26-01-2024، عەمید شاپوور فەلاحی، فەرماندەی پۆلیسی شاری زاهیدانی پارێزگای سیستان و بەلووچستانی ئێران رایگەیاند، دوو چەکدار لە دوورەوە دەستڕێژی گوللەیان لە بنکەی پۆلیسی ''شوروو''ـی شارەکە کردووە و دواتر هەڵاتوون.
عەمید فەلاحی ئاماژەی بەوە کرد، دوو تەقەکەرەکە مۆتۆرسکیلێکیان پێ بووە و دوای تەقەکردن و وەڵامدانەوەی خێرای هێزەکانی پۆلیس، دەستبەجێ شوێنەکەیان جێهێشتووە و خۆیان شاردووەتەوە.
بەگوتەی فەرماندەی پۆلیسی زاهیدان، رووداوەکە هیچ زیانێکی گیانی لێنەکەوتووەتەوە و لەلایەن هێزە ئەمنییەکانیشەوە بەدواداچوون و گەڕان بۆ دەستگیرکردنی دوو تەقەکەرەکە بەردەوامە.
زاهیدان ناوەندی پارێزگای سیستان و بەلووچستان لە باشووری رۆژهەڵاتی ئێرانە، کە زۆربەی رۆژانی هەینی خەڵک خۆپێشاندان دەکەن و ناڕەزایەتی بەرامبەر هەندێک لە سیاسەتەکانی دەسەڵاتی ئێران دەردەبڕن، هەروەها ناوە ناوە لەلایەن گرووپە چەکدارەکانی بەلووچ و سوننەی دژی کۆماری ئیسلامیی ئێران هێرش دەکرێتە سەر بنکەکانی پۆلیس کە چەندین جار کوژراو و برینداریشی لێکەوتووەتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ