شەوی کۆتایی کەمپەینی رەنجی رووداو؛ دەست بە ناردنی هاوکارییەکان دەکرێت

 

 

لە سەرەتای بەشی چوارەمی کەمپەینەکەدا، هونەرمەندی گەورەی کورد شڤان پەروەر بە گۆرانیی بەنێوبانگی 'کینە ئەم؟' بەشداریی کرد و هاونیشتمانییان بە چەپڵەڕێزان پێشوازییان لێکرد.

 

 

لەکاتی گۆرانییەکەدا، مامۆستایەکی ئایینی دانیشتبوو، خۆی بۆ نەگیرا و دەستی بە گریان کرد. رەنج سەنگاوی کە ئەو دیمەنەی بینی، چوو دەستی مامۆستاکەی گرت و بە شڤان پەروەری گوت، "مامۆستا شڤان، تۆ ورەی ئێمەی، تکایە بەم مامۆستا بڵێ با نەگری."

 

شڤان پەروەریش چوو دەستی مامۆستا ئایینییەکەی گرت و لەنێو چەپڵەڕێزانی ئامادەبوواندا تووند یەکیان لەئامێز گرت.

 

 

مامۆستا ئایینییەکە تووند دەستەکانی شڤان پەروەری گوشی و گوتی، "ئێمە بە تۆ سەربەرزین، تۆ ورەی ئێمەی، بیرمە لە ساڵی 1988 کە بەعس دایک و باوک و خوشک و براکانمی کوشت و بە تەنیا مامەوە، بۆ بەرزکردنەوەی ورەی خۆمان گوێمان لە تۆ دەگرت، ئێستاش کە ئەو گۆرانییەت گوت، منت بردەوە بۆ ئەو سەردەمە و نەمتوانی نەگریم."

 

شڤان پەروەریش پێی گوت، "خوشک و براکانت تاجی سەری ئێمەن، کەس ناتوانێت میلـلەتی کورد لەنێو ببات."

 

 

رەنج سەنگاوی لە شڤان پەروەری پرسی: کوردستان بۆ تۆ چییە؟ لە وەڵامدا گوتی، "کوردستان بۆ من بەهەشتە، گۆڕە، ئازادییە و ژیانە، کوردستان ژیانی نەتەوەییە، رۆژئاڤا فیداکارییە، رۆژهەڵات بیرهێنانەوەی سمکۆی شکاک و قازی محەممەد و بارزانیی نەمرە، باکوور شوێنەواری سەید رەزایە، شێخ سەعیدە، ئاگرییە، زیلانە، دایکی کوردستانە و زێدی مەلای جزیری، فەقێ تەیران، ئەحمەدی خانی و جگەرخوینە، باشوور خەباتە، خزمەتە، سەرەتای سەرهەڵدان و ئازادییە، بیرەوەریی شێخ عەبدولسەلام، بارزانیی نەمر و شێخ ئەحمەد و گەلەک کەسانن، وەکو ئاشتی و ئازادیی مەسعود بارزانییە."

 

 

 

مامۆستا جەلال خەیلانی، جێگری سەرۆکی یەکێتیی زانایانی ئایینیی ئیسلامی لە کوردستان، میوانی بەشی چوارەم و کۆتایی کەمپەینەکە بوو.

 

مامۆستا جەلال گوتی، "خوای گەورە دەفەرموێت، لەسەر کاری باشە یارمەتیی یەکدی بدەن و لەسەر کاری خراپە یارمەتیدەر مەبن. پێغەمبەری ئیسلامیش (د.خ) دەفەرموێت: خوای گەورە پشت و پەنای بەندەکانیەتی ئەگەر بەندەکان خۆیان پشت و پەنای یەکدی بن."

 

ئەو مامۆستا ئایینییە گوتیشی، "لە روانگەی پیرۆزی ئیسلامەوە بە هەموو هاونیشتمانییان دەڵێم: هاوکاریکردنی خەڵکی لێقەوماو، تەنیا خێرخوازی و کۆمەڵایەتی نییە، بەڵکو دیینییە و عیبادەتە. لە لایەنی نەتەوەییشەوە، باشترینتان ئەو کەسەیە کە بەرگری لە نەتەوەی خۆی بکات لەسەر کاری باشە."

 

 

ژنێکی بەساڵاچوو، بەو کەشە ساردە بڕێک پارەی وەکو هاوکاری بۆ خەڵکی رۆژئاوای کوردستان هێنابوو. بڕێک پارەی خستە نێو سندووقەکە و رەنج سەنگاوی لێی پرسی، "دایە گیان چۆنی؟" ژنەکەش بەدەم گریانەوە گوتی، "باشین شوکر، ئەلحەمدولیلا.. باشین بەڵام چ باش نینە، د خەمێ دایک و خوشک و برایێت خۆدا هیچ باش نینە، قەدەما منا شکەستی."

 

 

 

منداڵێکی تەمەن 11 ساڵان هات بۆ لای رەنج و گوتی، "من ناوم دڵوارە، مامم 7000 دیناری پێدام و گوتی بڕۆ لۆ خۆت خەرجی بکە، منیش هاتم یارمەتیی رۆژئاوای کوردستانی پێ بدەم."

 

دواتر، هاونیشتمانییەکی خەڵکی هەولێر، بە رەنج سەنگاویی گوت، "قورئانێکی پیرۆزم هێناوە پێشکێشی خەڵکی رۆژئاوای کوردستانی بکەم، ئەوانیش ئیماندار و خواناسن، وەکو چۆن شوێنە پیرۆزەکان و مزگەوتەکانی ئێمە خاپوور کران، ئێستا ئەوانیش ئاوان و لەنێو مزگەوتەکان دەمێننەوە، خوای گەورە بەم سەرمایە ببێتە پشت و پەنایان."

 

 

لەنێو بەرنامەکەدا، پەیامنێرانی سلێمانییش رووماڵی کۆکردنەوەی هاوکارییەکانیان کرد، لەکاتی راستەوخۆیەکی پێشەوا بەختیار دا، خێزانێک هاوکارییان هێنا و دایکەکە بە پێشەوای گوت، "ئەوان خوشک و برای ئێمەن، ئەرکی سەرشانمانە، پێداویستیی ناوماڵ و پێویستیی ژنانەمان هێناوە، ئەوەی لە تواناماندا بووبێت هێناومانە. ئینشائەڵڵا رۆژئاوا هەر سەرکەوتوو دەبێت، سەرکەوتنی ئەوان سەرکەوتنی ئێمەشە، بۆیە دەڵێین، تکایە کۆڵ مەدەن."

 

 

لەکاتی کۆکردنەوەی هاوکارییەکاندا، پێشمەرگەیەک هاتە لای رەنج سەنگاوی و گوتی، "وەڵاهی پارەم نەبوو، چونکە منداڵێکی کەمئەندامم هەیە، بەس ئەوەندە پارەیەم هەبوو ئەویشم هێنا بۆ خوشک و براکانمان لە رۆژئاوا."

 

 

ئەو پێشمەرگە گوتیشی، "ئەگەر جەنابی سەرۆک بارزانی بڕیار بدات، ئێمە خۆمان فیدای کوردایەتی دەکەین. خۆم لە داستانی پردێ بەشداربووم و شەڕی مان و نەمانمان کرد، ئینشائەڵڵا سەرکەوتن هەر بۆ کوردستانە."

 

 

ژنێکی بەساڵاچوو، چووە سەر سندووقی کۆکردنەوەی هاوکارییەکان و بڕێک پارەی خستە نێویەوە، رەنج سەنگاوی گوتی، "عەزێتت کێشا."

ژنەکەش لە وەڵامدا پێی گوت، "عەزێت نییە، لۆ کوردی خۆمانە، ئەمانەتی خوای بن، خوایە ئاگاداریان بی خوایە."

 

 

شڤان پەروەر، هاوشانی رەنج سەنگاوی مایەوە تاوەکو کۆتایی کەمپەینەکە. لەکاتی گۆرانییەکاندا گەنجێک زۆر بە حەماسەوە گۆرانییەکانی دەگوتەوە، بۆیە رەنج سەنگاوی بانگی کرد.

 

 

 

سەرهلدان ل سەرێ چیان هێی

بەرخوەدان د ناڤا زیندان

دەنگێ خۆرتا خوەش تێ من هەلە

دەنگێ کەچێن دلۆڤان

سەرهلدان، بەرخوەدان

سەرهلدان ژیانە هێی هێی

بەرخوەدان ژیانە......

 

 

 

گرووپی کۆمپانیاکانی دڵبین، بایی 50 ملیۆن دینار دەرمان

کۆمپانیای میدڵ تۆن، بایی 80 ملیۆن دینار دەرمان

کۆلێژەکانی عیشق و نیلوفەر، 5000 پارچە جلوبەرگ

کۆمپانیای هەستین، 1000 فەردە برنج

ئای ستار میدیا، 1000 بەتانی،  1200 قوتووی شیر، 1200 مرشیکی لە قوتووکراو و 500 سەبەتەی خۆراک

قوتابیانی بەشی یاسا لە زانکۆی نۆلیج، 2 ملیۆن و 830 هەزار دینار

کارگەی بی ئاڕ تۆن

کۆمپانیای مەردان گولی، یەک بارهەڵگر یاری و پێداویستی منداڵان

کۆمپانیای ئاسۆ، 1000 بەتانی، 1000 سەبەتە خۆراک، 1000 پارچە جلوبەرگ

چەند هاونیشتمانییەک لە کەرکووک، 2500 دۆلار

ئاسۆ شەمێرانی، 5 ملیۆن و 750 هەزار دینار

هاونیشتمانییەک لە ئەڵمانیا: 1000 دۆلار

مەکتەب راستی بۆ بازرگانیی پێڵاو: 3000 جووت پێڵاو

کارگەی نەهرۆ، 372 بەتانی

کۆمپانیای دۆی قەندیل، یەک بارهەڵگر خۆراک و بەتانی

براندی خاک، 150 پارجە جل

هاونیشتمانییەک لە باکووری کوردستان، 1000 دۆلار

کلینیکی ڤاری، 10هەزار دۆلار

کۆمپانیاکانی سپەیس دیزاین و سپەیس هوود، 600 سەبەتەی خۆراک

کۆمپانیای سەن گرووپ، 240 سۆپای نەوتی و 500 لایتی شەحن

کۆمپانیای ریدێکس، 100 پێخەف و 1000 کارتۆن خواردن

کۆمپانیای ئەربیل ئاجێنسی

رێکخراوی کوردانی نەرویج، 15 هەزار دۆلار

هاونیشتمانییەک، 300 یۆرۆ