رووداو دیجیتاڵ
بەردانەوەی ئاوی رووباری ئەڵوەن لەلایەن ئێرانەوە و قوڕولیتە لە بەنداوی ئەڵوەن بوونەتە هەڕەشەیەکی جیدی. بەگوێرەی ئەو ئامارانەی دەست رووداو کەوتوون، بەردانەوەی ئاوی ئەڵوەن لەلایەن ئێرانەوە، لە چرکەیەکدا 3 مەتر سێجا تێناپەڕێنێت.
ئەمڕۆ چوارشەممە، 27ی ئابی 2025، جەواد فەیزوڵڵا، قایمقامی قەزای خانەقین بە تۆڕی میدیایی رووداوی راگەیاند، "بەشێکی زۆری رووباری ئەڵوەن بە درێژایی تا دەگاتە بەنداوەکە، قامیشی تێدا روواوە و ئەمەش سیمای رووبار و بەنداوەکەی تێکداوە، نووسراویشمان کردووە بۆ دیالە بۆ ئەوەی بودجەیەکی تایبەتمان بۆ تەرخان بکرێت بۆ خاوێنکردنەوەی، بەڵام تاوەکو ئێستا وەڵاممان نەدراوەتەوە."
جەواد فەیزوڵڵا گوتی، "ئاوی رووبارەکە بەشێوەیەکی بەرچاو کەمی کردووە، ئەمە جگە لەوەی بەنداوی ئەڵوەن نزیکەی 15 ملیۆن مەتر سێجای بووە بە قوڕ و لیتە، ئەوەش هەڕەشەیەکی جیدییە بۆ سەر بەنداوەکە و پێویستە حکومەت هاوکارمان بێت بۆ خاوێنکردنەوەی."
دوایین ئاماری ئاوی بەنداوی ئەڵوەن کە دەست تۆڕی میدیایی رووداو کەوتووە بەم شێوەیە:
- ئاستی ئاو لە 214.87 مەتر سێجاوە بۆ 214.31 مەتر سێجا دابەزیوە.
- بڕی گلدانەوەی ئاو لە بەنداوەکە لە 37.127 ملیۆن مەتر سێجاوە بۆ 33.951 ملیۆن مەتر سێجا کەم بووەتەوە؛ رێژەی کەمبوونەوەکە 8.5%.
قایمقامی خانەقین ئاماژەی بەوە کرد، "هۆکاری کەمبووەنەوەی ئاوی گلدراوە، زیادبوونی بڕی ئەو ئاوەیە کە لە بەنداوەکە بەرەو ناوچەکانی خواروو بەردەدرێتەوە، بەجۆرێک کە زیاترە لەو بڕە ئاوەی لە ئێرانەوە بۆ رووبارەکە بەردەدرێتەوە، هەروەها کەمیی بارانبارینیش هۆکارێکی دیکەیە."
بەگوێرەی ئامارەکە، بەردانەوەی ئاو لەلایەن ئێرانەوە لە ساڵانی رابردوودا لە نێوان 3 بۆ 5 مەتر سێجا بووە لە چرکەیەکدا، بەڵام ئێستا لە چرکەیەکدا 3 مەتر سێجا تێناپەڕێنێت، بەڵام رۆژانە لە چرکەیەکدا 6 مەتر سێجا ئاو لە بەنداوەکەوە بۆ ناوچەکانی خوارووی خۆی بەردەدرێتەوە.
هەر لە ئامارەکەدا هاتووە، وەرزی زستان و بەهاری رابردوو لە سنووری خانەقین 175 میلیمەتر باران باریوە.
لە ئامارەکەدا ئاماژە بەوە کراوە، رێژەی خوێ تواوەکان لە ئاوی بەنداوەکەدا، 840 میلیگرام/لیترەوە بۆ 920 میلیگرام/لیتر بەرز بووەتەوە، هۆکارەکەشی دەگەڕێتەوە بۆ کەمبوونەوەی ئاوی گلدراوە و زیادبوونی رێژەی بەهەڵمبوون.
بەنداوی ئەڵوەن جگە لە دابینکردنی ئاوی خواردنەوەی خانەقین، 2554 دۆنم باخ و 30 ههزار دۆنم زهویی كشتوكاڵی و پێنج پڕۆژهی بهخێوكردنی ماسی لەسەرە.
سەرچاوەی ئاوی بەنداوی ئەڵوەن 90% پشت بەو ئاوە دەبەستێت کە لە رێژاو لە کرماشانی رۆژهەڵاتی کوردستانەوە سەرچاوە دەگرێت، 10%ـش پشت بە باران دەبەستێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ