رووداو دیجیتاڵ
وەزارەتی ناوخۆ روونکردنەوەیەک لەبارەی دۆخی ئەمنیی هەرێمی کوردستان بڵاودەکاتەوە و داوا دەکات هاونیشتمانییان و هاووڵاتییان نەکەونە ژێر کاریگەریی "پڕوپاگەندەی نەیارانەوە."
ئەمڕۆ یەکشەممە، وەزارەتی ناوخۆی حکومەتی هەرێمی کوردستان لە راگەیێندراوێکدا ئاماژەی بەوە کرد، بەهۆی ئەو بارودۆخەی لە ناوچەکە و عێراق هەیە، "هەندێک سەرچاوە زانیاریی نادروست دەربارەی باری ئەمنیی هەرێمی کوردستان بڵاودەکەنەوە."
وەزارەتی ناوخۆ هۆکاری ئەو جۆرە هەواڵانە بۆ "ئاڵۆزکردنی زیاتری دۆخەکە و بڵاوکردنەوەی ترس و تۆقاندن لەنێو هاووڵاتییان" دەگەڕێنێتەوە.
لە راگەیێندراوەکەدا داوا لە خەڵک کراوە "تەنیا لە سەرچاوە فەرمییەکانی حکومەتی هەرێمی کوردستانەوە زانیاری لەمبارەیەوە وەربگرن و نەکەونە ژێر کاریگەریی پڕوپاگەندەی نەیارانەوە."
هەروەها وەزارەتی ناوخۆ پەیامێک ئاراستەی کەناڵەکانی راگەیاندن دەکات و داوایان لێدەکات "بە وریایی مامەڵە لەگەڵ هەر هەواڵ و زانیارییەک بکەن کە پەیوەندیی بە ئاسایشی هاووڵاتییانەوە هەبێت، و بەبێ وردبینی لەگەڵ لایەنی پەیوەندیدار، زانیاریی نادروست بڵاونەکەنەوە."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ